Kua whakawhānui ake te wā tuku tono a Te Rōpū Reipa whai muri i ngā mahi a Taurima

  • Tāmaki Makaurau

E ai ki te Rōpū Reipa kua huri tuara pea ētahi ki te rapu tūranga kaitono me rātou ao ake i ngā raruraru i pā ki a Shane Taurima.

Nā whai anō rā te aro ki te whakatōroa i te wā tono ingoa.

Tūturu, ko Shane Taurima tērā kei te putake o te whakaaro whakatārewa.

E ai ki a Reipa, hei āpōpō whakatauria ai, engari ki te whakaritea he rā hou mō te aukati tono, hei tā rātou ka whai pānga ki te rā e oti ai te arotake a Te Reo Tataki mō Shane Taurima me ngā whakapae mōna.

Mō te taha ki ngā rohe pōti Māori koinei e whai ake nei te whakarārangitanga i tēnei wā.

Ki Tāmaki Makaurau, tūturu e rere ana ngā whakapae mō Shane Taurima mā Reipa.

Mō te Paati Māori, kua tū ngā ringa a Te Hira Paenga, Tūnuiarangi McLean rātou ko George Ngatai.

Ki Te Tai Tokerau, ko Hone Harawira tērā mō Mana, ā, kei te whaia anōtia a Kelvin Davis mō te Rōpū Reipa.

Kua kōkirihia kētia te whakataetae ki Te Tai Hauauru - arā ko Adrian Rurawhe mō Reipa, me Chris McKenzie mō te Pāti Māori.

Ki te Waiariki, ko ngā tautohito a Te Ururoa Flavell rāua ko Annette Sykes anō tērā, engari, te āhua nei he whakataetae kei te haere i waenga i ngā toa haka a Ryan Te Wara o Te Iti Kahurangi, me Rawiri Waititi o Te Whānau a Apanui.

Ki Te Ikaroa Rāwhiti, ko Meka Whaitiri mō Reipa me Te Hamua Nikora mō Mana ka tuki anō rae ki te rae.

Ā, kāre anō he ingoa kia puta i ngā rohe o Hauraki-Waikato me Te Tai Tonga i tua i ngā mema pāremata o te wā.