Kua whakatuwherahia Te Pūmanawa o te Waiora

Dean Nathan
  • Te Tai Tokerau

Ki Te Tai Tokerau, neke atu i te whitu tekau ngā tauira i karahuihui atu ki te whakatuwheratanga o tō rātou kura hōu, arā, te kura hourua ki Whangaruru i te atatū nei. He tino whakatutukitanga t`enei i roto i te wā poto, ahakoa hoki ngā tautohe me ngā whakahē a ētahi o ngā roopu tino whai mana o te ao mātauranga ki ngā kura hourua.

E taki ana ngā karakia i te atapō nei mo te whakapūaretanga o te kura hōurua ki Whangaruru e kiia ana ko te pūmanawa o te waiora.

Ko tā Natasha Sadler no te Kura Hōurua o Whangaruru, “ko te tumanako ko te wawata na to tatou iwi na ngā tupuna na ratou ano I hiahia kia whakatū enei tūmomo ahuatanga mo ngā tamariki mokopuna.”

Kua roa kē ngā ngoikoretanga o te wahanga auraki ki te hāpai i te matauranga o ngā tauira Māori ki tēnei rohe na reira te huringa o ngā mātua ki ngā kura hourua nei hei ara whakamau i ngā wawata mo ngā uri whakaheke kia tina.

Ko tā Hori Parata te heamana o  Ngā Pariraru Mātauranga, “hei tuku ako ki to tatou nei tamariki mokopuna ngā whakaaro ngā tikanga to tatou nei reo rangatira na reira koira to matou tino wawata mo to tatou nei kura.”

Hihiko ana te wairua o te hui i ngā tamatāne o te kura hōurua o Whangarei Terenga Paraoa i tae-ā-tinana atu ki te tautoko i te kaupapa pau te kaha me te tuku ano i tetahi o o rātou tuakana kia whiti mai ia ki te kura hōurua ki Whangaruru. 

Ko tā Natasha Sadler ano, “kei reira katoa ōna taimahatanga engari ko te mea tino nui rawa atu me whai whakaaro ki ngā tamariki me o ratou whānau ā mā konā e kore rawa tatou e raruraru.”

E ai ki ngā kaiwhakahāere, i konei timata ai te hikoi a ngā tamariki mokopuna i te ara e tino mōhio ai ratou ko wai ratou.