Kua whakatūwhera te wharenui hōu o Arahura Marae

Wepiha Te Kanawa
  • Te Waipounamu

Tata ki te kotahi rau rima tekau tau nō te wā e taea ai a Ngāti Waewae he hapū o Ngāi Tahu te kī he whare tīpuna motuhake tā rātou.

He whā tau tēnei kaupapa e whanake ana, ā, he rima ira rima miriona tāra te wāriu.  I tēnei rā i whakatūwhera te marae hōu o Arahura.

Koinei te karanga tuatahi te rere ki te marae o Arahura, te wā tuatahi hoki kua kitea e ēnei uri o Ngāti Waewae, tō rātou whare tīpuna hōu.

E ai ki a Kukupa Tirikatene, “Kua kite koe i roto i te whare te āhuatanga, kua hangaia mō ngā uri o tēnei wā, me ngā uri whakaheke.  Kua hangaia me kī hei pou.”

Noho tūturu ana ki te momo o Ngāi Tahu, kua whakarākei a Tūhuru ki te pounamu, ko ngā tauā e pupuri ana i ngā kōhatu tapu nei o te awa.

Ki tā Te Rua Mason, “Mai rāno i roto i ngā pakanga, tae noa ki tēnei wā.  I taua wā ko te pounamu he kōhatu tuku riri, he kōhatu pakanga ki ngā iwi ki ngā hapū otirā ki ngā whānau hoki.  I tēnei rāngi ko te pounamu he kōhatu tūia i te tangata, ki runga ki raro, ki roto ki waho he kōhatu kawe i te ngāwari.”

He tikanga hoki nō te ao kōhatu te karawhiua a ngā wāhine i te rākau, i tēnei rā i whakarauoratia ai e rātou.

Hei tā Henare Teaika Puanaki, “Kua heke kē ngā roimata i roto i ngā tau, ngā roimata e tohu nei i te pōuri e ngaro haere ana ngā tikanga me te reo.  Engari i tēnei rā kei te kitea kei te hoki mai te reo, kei te hoki ōna tikanga kei te tū pakari a Ngāti Waewae.”

Ināianei kua ea te taha ki ngā tikanga ōkawa, ā, kua rite pai a Tūhuru.  Ko tana kaupapa tuatahi ka tū āpōpō, ko te hui ā-tau a Ngāi Tahu tērā.