Kaupapa: Te Matatini

Kua whakatuhia te mahau o Te Matatini

Mere McLean
  • Waikato/Te Waiariki

I te rangi nei i tīmata te tatauhia o ngā rā e toe ana kia tīmata rā anō Te Matatini, whai muri i te kawenga o te mahau atu i Te Puia ki te papa whakataetae o Te Matatini. E toru tekau mita te whanui, he tekau ma toru mita te teitei, e rua tekau ma ono tana te taumaha, ka noho te whakairo nei hei mahau mo Te Matatini, ko ngā iwi katoa o te motu e tohua ana, i roto tonu i öna whakairoiro.

Ka timata te hikoitanga mō te mahau o Te Matatini, atu i tēnei wā ka noho mai koia hei māhau mo ngā Matatini e whai ake nei.

Ko tā Mauriora kingi o Te Arawa,”ka mutu tenei o ngā Matatini, koinei te mahau ka tu ki roto i ngā mahau kei roto i ngā tau e tu mai nei, kaua ko tenei Matatini anake.”

Kua whā marama te roa o ngā mahi whakairo i te māhau nei, rua tekau ngā ringa rehe e whakairo ana.  Ko te papa ahuru o tēnei taonga i tikina mai i ngā korero o te orokohanga o ngā mahi whakairo, ka tuhono nei i te Māori me te Moana Nui a Kiwa.  He pae tawhiti tenei kua whakatinanahia, e rere nei ngā kare a roto.

I timata kau te tūhonotanga ki waenga i Te Matatini me Te Puia i te tau rua mano ma iwa, a muri i tenei ka rere ngā mahi whakarite e tu ai a Te Matatini.

Ko tā te Tumu Whakarae o Te Matatini ko Darrin Apanui, “ko ta matou e wawata ana kia tae mai te iti me te rahi, rua tekau ma rima mano te minenga ka taea te noho ki roto nei.”

Rua wiki e toe ana, katahi ka tu ko Te Matatini ki roto o Rotorua, ki roto o Te Arawa, kei muri i au te papa whakatutu waewae e whakaritehia ana, hei reira ka kite ai tatau i nga toa ka tu ki mua i te mura o te ahi.