Kaupapa: Politics

Kua whakatū tētahi uri o Ngāpuhi hei toihau kaimahi mā Reipa

  • Te Whanganui-ā-Tara

Ko Matt McCarten o Ngāpuhi kua tohua hei toihau o ngā kaimahi a te rōpū Reipa. He tangata whakapeto ngoi ia mō ngä tika o te hunga kaimahi, o te hunga rawakore anō hoki, ā, inaianei kua tahuri nei tōna aro ki te āwhina i a Reipa kia eke hei kāwanatanga i tēnei tau pōti.

Kua hoki rā ki tōna tūrangawaewae tōrangapū, ā, mōnā i turaki nei i te mate pukupuku, ko te pātai ia mēnā he ara tēnei i whakaritea e Te Atua?

Hei tā Matt McCarten, kei te tino whakapono ia he nui tonu ngā mahi kei mua rā kāore anō kia oti i a ia.

Kāti, kāore e kore he merekara tēnei e whāia nei e Reipa ao ake i ngā tatau pōti o te wā. Kua peke a Nāhinara mā te ono ōrau, otirā kua pae a Reipa ki te toru tekau mā whā ōrau.

Tūturu, ko tōna reo kaha mō ngā uniana kaimahi tērā e mōhiotia ai a Matt McCarten. He hikoi tōrangapū i timata me Reipa, hēoi, nā te tohetohe tonu i wehe ai. Ka whakarewangia ko te rōpū Alliance, ā, ka noho ia hei perehetini. Hēoi, i te whakakorenga o taua rōpū ka piri atu a Matt McCarten ki te Pāti Maori, katahi ki a Mana.

Āpiti atu e ai ki a Willie Jackson, mema pāremata i raro i te rōpū Alliance i te wā o McCarten - he tangata ū te korokē nei ki te kaupapa.

“Kāore au mō te whakapono he tangata kūpapa a Matt. He tangata e ū mārika nei ki te ara e takahia nei e ia”

Āe mārika! He wero nui kei te haere mō Matt McCarten, otirā te rōpū Reipa, ā, mā te wā noa e kite pēnā ka āminetia ōna inoi hou, kahore rānei.