Kaupapa: Weather

Kua whakatahia atu te kura Māori o Hukarere

Aroha Treacher
  • Te Tai Rāwhiti

I whakatahia atu ngā tauira ki te kura māori o te kāreti o Hukarere nā te nui o ngā waipuke ki te raki o Te Matau a Māui. E iwa tekau katoa te tokomaha o ngā kōhine me ngā kaimahi i arahina e ngā pirihimana ki wāhi marutau.

"Waipuke te huarahi o SH5, i whakaahuru ahau i ngā tauri kei te haumaru tātou i tēnei wā tonu. Nā te teitei o ngā ruma ako, i waipuke ngā whīra, heoi ko te raru nui ki a mātou ko te wehe atu i te SH5," tā Lelie Pearcey, te tumuaki o Hukarere.

He kōtahi rau ngā tauira nō te kura waenganui o Maungawharau i whakatahia atu i te takiwā o Rissington, i kati hoki te mīra o Panpac ki Whirinaki nā te kino o te marangai.

"Inapō i tangi ai ngā pere whakatupato, kei te mōhio tātou kua whakatahia atu te kura o Huakrere i te ata nei, me te waahi puni, otira i waipuke te rori o Shore, i wehe atu ētahi tāngata i o rātou kāinga. I tae atu hoki ngā ratona whawhati tata ki te tuku awhina i aua tāngata," tā Ian Macdonald nō te Rākau Whakamarumaru o Te Matau a Māui.

Katoa ngā rori kei te raki o Ahuriri e kati ana i tēnei wā tonu, heoi e matapaetia ana ka heke marika tonu te marangai mō te roanga atu o te pō.

"Kei te aro pū tātou i ngā tohu huarere, heoi, he matawhawhati ngā tohu huarere, kei te kite tātou i te pikinga ake ngā tūāhuatanga pēnei," tā Macdonald.

Kei te āta tiro te Rākau Whakamarumaru me ngā mana whakahaere o te rohe i ngā nekenekehanga, ka tuku mahere whakarere kainga i rātou mēnā e hiahiatia ai.