Ngā kaupapa: Business, Technology

Kua whakamanahia te hononga ki waenga i a Whānau Tahi me Callaghan Innovation hei painga ā-tihi mā ngā whānau

updated Te Kāea
  • Tāmaki Makaurau
Whānau Tahi Director Stephen Keung & Callaghan Innovation GM Māori Economy Hemi Rolleston sign MoU

Ko Whānau Tahi tētahi rōpū e kaha ana ki te whakamahi i ngā rauemi hangarau hei whakahonohono i ngā whānau, iwi, ratonga me ngā tari o te ora.

I te rā nei, i hainatia e rātou tētahi kawenata whakaae ki a Callaghan Innovation, he kamupene e hāpai ana i ngā pakihi kia tū pakari ā-hokohoko nei me te whakamahi i ngā rauemi ā-hangarau, kia pai ake ai te whai mōhiotanga a ngā tūroro me ngā whānau ki a rātou raraunga hauora.

Kua whakarauika mai ngā huanga o Whānau Tahi ki roto o Waipareira kia whakanuia ai te hononga o Callaghan Innovation me tō rātou kapa.

E ai ki a Stephen Keung, tō rātou pouwhakahaere ko te whakatika i te Māori kia whai i ngō rātou ake ara haumanu, te whāinga matua.

Ko Keung tērā e mea ana, “Ko te hiahia tonu o Waipareira kia mōhio mēnā e whai hua ana ā rātou mahi, nā reira ka hanga rauemi hangarau hei awhina, hei tautoko, i ngā kaimahi me ngā tūroro.”

I kōrero a Keung mō te rautaki o Whānau Tahi, me te aronga nui ki te tangata, me tōna whānau, koia kē te uara i whakahahaki i a Callaghan Innovation.

Ko te hangarau tētahi o ngā tino taonga e whakamahia nei e te rāngai hauora, ka kōrero mai a Hemi Rolleston, Pouwhakahaere o ngā Take Ōhanga Māori o Callaghan Innovation, mō te timatanga mai o tēnei hononga o ngā rōpu e rua nei.

E ai ki a Rolleston, "Mā mātou e wānanga, e wāwāhi i ngā whakaaro, kātahi ka tukuna ko ngō mātou tohunga pūtaiao, tohunga hanga rauemi hangarau, ā, kua hua mai ko ngā rauemi hōu, me te whakakaha i te hononga nei hoki."

Ehake tēnei i te wā tuatahi kua titiro a Whānau Tahi ki ngā pakihi nui o te ao, e mahi tahi nei rātou me Microsoft, Families First me Meditek. Nā Rolleston i whakamohio mai he aha tō rātou aronga tuatahi.

Ki tā Rolleston, “Ki konā tīmata ai ngā mahi, ka noho mai tēnā hei ahurewa, me te whāinga kua whai hua tonu, e kite ai te iwi i te hua.”

Mai i kōnei ka ngana ngā rōpū e rua ki te hanga rauemi hangarau kia whakamahia ai ki Aotearoa, otirā ki te ao whānui, i runga hoki i te mōhio, nā Māori te āwangawanga, nā Māori hoki te huarahi anga whakamua.