Kaupapa: Housing

Kua whakahōu ētahi o ngā whare kaporeihana o te rohe o Huntly

Te Kāea
  • Waikato/Te Waiariki

Ko te hapori iti o Rāhui Pōkeka anō tērā i whakatūwhera i ō rātou kāinga mana hoko tuatahi, tuatahi rawa, i raro i te maru o Te Tarahiti Nikau Whānau Estate.

Nā te ika-a-whiro rīki, nā Tawera Nikau me tētahi rōpū nō Matahuru Marae te wawata i ngā marama ki muri, kia hoko, kia whakahōu hoki i ētahi o ngā whare kaporeihana o taua rohe.

Ko te mea mīharo kē ia, nā ngā whānau tonu mā rātou ngā whare, ngā mahi whakapaipai i mahi.  

Ko John Biddle tēneki, he uri nō te marae o Matauru, kātahi anō ia ka hoko i tōna kainga tuarua, i raro i tōna tarahiti whānau.

I hokona e Nikau Housing Ltd ngā whare tekau ma ono i Rāhui Pōkeka mō te kotahi ira rua mīriona tāra.

I raro i te here mana hoko tuatahi ki roto i te whakataunga Raupatu Whenua o Waikato, iwa tekau mā rima, ka whai wāhi ngā uri o Waikato-Tainui ki te hoko tuatahi i ngā whare e hokongia ana e te karauna.  Nā konā, kua whai wāhi a Tawera Nikau ki te hoko i ngāua whare.

E toru, e whā rānei ngā rūma moe kei ia whare mō te kotahi RAU tekau mano ki te kotahi RAU whitu tekau mano noaiho.  Kua hokona ngētehi o ngā whare hei nohonga roa, ko ngētehi atu hei pūtea penapena.

Ko te manako ia, mā te whakatau o Waikato-Tainui  ki te whai kerēme whenua ki Tāmaki Makaurau, ka whai wāhi hoki ai ō rātou uri e noho ana ki tauaka rohe,  ki te hoko whare, whēnei i tēnei uri nō te marae o Matahuru.