Kaupapa: Fashion

Kua whakahēngia a Trelise Cooper na te whakamahingia o te kōtaha a iwi taketake

Wepiha Te Kanawa
  • Tāmaki Makaurau

Kua tuku whakapāha atu a Kahurangi Trelise Cooper mō tāna whakaaturanga pueru e kīa ana ko "70s Vibe," ko āna wāhine e mau ana i ngā pōtae pakanga o te iwi taketake o Amerika.

Ko pukamata tērā i reia ki ngā nawe a te marea, me te mea ake he mahi takahi tēnei i te mana o ngā iwi tuatahi, ko Taika Waititi hoki tērā e tautoko ana i ngā kōrero whakahē me tana tuku tuhi tīhau.

I reira te rangatira takirua o Miromoda a Ata Te Kanawa i te whakaaturanga ināpō, ko tāna i puta te āwangawanga me te ohorere.

Ko tā Kahurangi Trelise Cooper mā runga i a pukamata "Kāore ia mō te takahi mana mā te whakamahi i ngā pōtae pakanga a te iwi taketake o Amerika."

Kua kitea kētia e tātou ēnei pōtae i runga i te papa pueru, nā te whare pueru nō Wiwi a Chanel me te kaiwaiata a Pharell Williams, heoi ko te tūmanako koinei te wā whakamutunga e kitea ai ki konei.