Kua whai raru te Kaunihera ā rohe o Te Matau ā Maui i te huringa o Ngāi Tahu

  • Te Tai Rāwhiti

Ko te peka whakangao pūtea o te Kaunihera ā Rohe o Te Matau a Maui tērā e wawata ana kia kohi ake kia rua rau whitu tekau mā rima miriona tāra mo te pāpuni Wai o Ruataniwha, e $600 miriona tāra te wariu.

Engari i te marama o Maehe, ka hūtia atu e te kamupene hiko a Trustpower āna putea whakangao, nā wai rā, ko Ngai Tahu tērā ka whai atu.

Hei ta te peka whakangao pūtea o te Rūnanga o Ngāi Tahu, a Ngāi Tahu Holdings Corporation kāhore anō tētahi kaiwhakangao kia whakakii ake i te tūranga i waihotia ake e Trustpower nō reira ka mutu tāna whakaenga me te Peka Whakangao o Te Kaunihera a Rohe o Te Matau a Maui. 

Ko Trustpower me Ngāi Tahu ērā i wawata kia whakauru ngātahi atu kia 100 miriona tāra ki te pāpuni wai.

Kāhore anō te peka whakangao o Te Matau a Maui kia whiwhi i tētahi tono mahi mō te pāpuni wai nā runga i ngā nawe mo te nui o ngā para nitrate ka tere atu ki te hīnaki o Tukituki.

Nā, tuku atu ana te pātai ki tana tumu whakarae, me he mea, ko te pāpuni wai tērā e toromi ana ki te wai i mua i tāna tīmatatanga?

Ko tā Andrew Newman , “Kāre ano kia toromi te kaupapa nā te mea kei te rapu huarahi tonu te Kaunihera, kare ano kia oti."

Kīhai a Ngāi Tahu i whakāe kia tuku kōrero ā kamera mai, engari e mārama ana te peka whakangao o te Kaunihera e wātea tonu ana a Ngāi Tahu ki te wānanga i te take nei.