Kaupapa: Mining

Kua whai raihana keri hinu a Chevron Oil ki Aotearoa

  • Te Tai Tokerau

Tata ki te whā tekau mā waru mano kiromita huarua te rahi o te wāhi kua whakaaetia e te kāwanatanga mō ngā mahi tirotiro hinu ki Aotearoa.

E ono ngā raihana kua tukuna mō ngā mahi tirotiro ki uta, ā, e iwa ngā raihana tirotiro ki tai.

Ka mutu, e ai ki te Minita Rawa Pūngao, ki a Simon Bridges, ki te huri ki te keri hinu, ka kite pea tātou i te puna hōhonu rawa atu i te hītori o Aotearoa.

E toru tau ki muri i ngā tai ki Brazil e rua mano whā rau ngā kaho hinu i maringi. He parekura i toko ake i ngā mahi a te kamupene hinu a Chevron, he kamupene i whai raihana tirotiro hinu ki Aotearoa i te rangi nei.

Tekau mā rima katoa ngā raihana kua tukuna e te kāwanatanga. E toru o ngā raihana nui rawa kua riro ki te kamupene Chevron i te taha Rāwhiti o Te Ika a Maui. Ahakoa te raru ki Brazil e ai ki te Minita kare i taumaha ake ngā tikanga tono raihana mā rātou.

Ka mahi tahi a Chevron i ngā raihana hou rā me te kamupene me Statoil, e kawe tonu ana i tā rātou raihana tirotiro ki Te Tai Tokerau, ki Te Reinga.

Kua kotahi tau a Statoil i reira, heoi, e rangona tonu ana te apitihana a te hau kainga. I tū tētahi konohete porotēhi i ngā rangi whakata kua hori.

Kāti, e ai ki te kāwanatanga ko ngā tūranga mahi te hua mō ngā hāpori pēnei me Te Tai Tokerau, heoi, e kore a Statoil mo te tuku oati, ka mutu, e kore hoki e kitea ina ngeto nei.

Kāti hei te marama o Poutu-te-rangi kokirihia te wāhanga tuku tono mō ngā raihana tirotiro hou rua mano tekau mā rima.