Kua whai mana a Ngāti Awa ki te āwhina i te tiaki i tētahi urupā tawhito

Te Kāea
  • Waikato/Te Waiariki

Kua whai mana a Ngāti Awa te whakanui i tētahi o ngā pā tawhito i te takiwā o Matatā whai muri hoki i te raupatutanga o aua whenua i ngā rau tau tekau mā iwa.

I te rā nei i whai mana te tono a Te Rūnanga o Ngāti Awa i roto i a rātou whakawhitiwhiti kōrero me te kōti whenua Māori, kia mahi tahi hoki a Ngāti Rangitihi me Tūwharetoa te tiaki i te urupā o Otaramuturangi.  

Kua whai mana a Ngāti Awa te āwhina ki te tiaki i tēnei urupā, waru rau tau tōna tawhito.

E ai ki a Pouroto Ngaropo, “Inaianei kua whai pānga ngā iwi katoa e whai pānga ki tēnei urupā. Ko te tumanako mō tō tātou iwi o Ngāti Awa kia uru mai katoa ngā iwi ki tēnei whenua tuarua. Kua whakaritea ngā kaitiaki  mō te urupā nei. Kei konei ngā tīpuna e takoto ana.”

I whakanuia anō te hononga o Ngāti Rangitihi ki te urupā nei, nā reira te tono a Ngāti Awa ki te kōti kia āta whakarerekētia te ota o te tau kotahi mano iwa rau ono tekau mā toru kia whai panga anō hoki rātou ki tēnei whenua. Ka kore rawa te mana kaitiaki a Ngāti Rangitihi e wareware.  

Hei tā Ngaropo, “Ko te tumanako kia whakahokia mai ngā uri katoa o Ngāti Awa ki tēnei urupā nātemea he urupā tino tawhito tēnei o ngā urupā katoa o Ngāti Awa. Kei konei a tētahi o te rangi, kei konei a hiki kino mā a Te Rangi Hauhiri nga uri o tona tini ara a Tai Whakaia, kei mōhio ai rātou ki tēnei urupā o rātou, kia kore rātou e wareware.”

Ahakoa ngā hiahia o Ngāti Awa i rō kōti mō te tiaki i te urupā, kei te whakanui tonu tā rātou rūnanga i ngā manako a Rangitihi.

Ki tā Ngaropo, “Nō te kōti whenua te hē. Kare te kōti i whakapā mai ki tō tātou iwi o Ngāti Awa i hē te koti i taua wā, ā koina te raruraru, te pūtake o tēnei kaupapa i kawea nei ki te kōti ara ki te whakatika i te hē.”