Kaupapa: Education

Kua wehe ki te pō tētahi kaumātua rangatira o Tauranga Moana a Monty Rereamomo Ohia

updated Wepiha Te Kanawa
  • Waikato/Te Waiariki

He pōkēao e iri nei ki ngā iwi o Tauranga Moana i te ngarohanga o tētahi o ngā kaumātua rangatira o Ngā Pōtiki a Monty Rereamomo Ohia.

E iwa tekau mā whā ōna tau ka hinga ia i tōna kāinga ināpō, ā he nui āna ōhāki i waihotia iho.

I raro i te marumaru o te maunga o Kopukairoa, rere ai ngā roimata mō te kaumātua a "Koro" Monty Ohia.

E ai ki tana mokopuna, a Bentham Ohia, “Tino pouri mātou, me kī heke ngā roimata me ngā hūpē i te ngarotanga atu o tō tātou nei pou, tō tātou koroua, tō tātou nei rangatira.”

He tangata hūmarie, ringapaupā ia i mahi ki te wāpū o Tauranga me tana pāmu ki Pāpāmoa i te roanga o tōna oranga.

I tautoko hoki ia i te hanganga o tana marae a Te Whetu o Te Rangi whai muri i tana hinganga ki te ahi i te tau rua mano mā ono.

Ki tā Bentham Ohia, “He kaha nei ia ki te arahi nei a tātou, ki te akiaki, ki te hāpai anō hoki i te iti, i te rahi o tātou nei a Ngāti Pukenga.”

Hei tā Paraone Gloyne, “Me pēhea e kore ai e whakaaro ki ērā o ana mokopuna ki a Te Atirau ki a Bentham mōna i noho hei pouhere mō Te Wānanga o Aotearoa mō te wā roa.”

E ai ki a Marie Panapa, “Tērā he whānau i puta mai te aroha, mai te ngākau ki te iwi, ki te iwi nō konei ahakoa nō hea, koira te āhua o te whānau Ohia.”

E ai ki tāna mokopuna, ki a Bentham Ohia, he poutokomana ia mō ngā iwi katoa o te moana o Tauranga.

Ki tā Bentham Ohia, “He tangata kaha manāki, he tangata whakatoe hoki tō mātou nei koroua, kaha nei ia ki te hāpai i te iti me te rahi, otirā me te mea ano hoki he nui ana mātauranga.”

Ka tākoto a "Koro" Monty ki te marae nei o Te Whetu o Te Rangi, kātahi ka nuku ki te marae o Tāhūwhakatiki i mua i tāna tanumitanga a te Rāmere.