Ngā kaupapa: Iwi Settlements, Land, Treaty Settlements

Kua waipuketia te ipurangi i ngā whitiāhua haka e tautoko ana i a Tauranga Moana

Leah Te Whata
  • Waikato/Te Waiariki

He manomano tāngata kei te whakaputa whitiata ki te pae papori o te takitini e haka ana, hei tautoko i a Tauranga Moana. He tūtira atu ki tū totohe a ngā iwi o Tauranga e whai nei i ō rātou mana moana, mana whenua, mana tangata. 

I pakarū te ipurangi e ngā kaitautoko o Tauranga Moana nā te tini me te mano i whakarewa whitiāhua haka kia whakahē i ngā whakataunga tiriti o Pare Hauraki.

He kohikohinga iwi a Pare Hauraki, ā, taro ake, ka whaipānga atu rātou ki Tauranga Moana. Ko te whakapae o Ngāti Ranginui me Ngāi Te Rangi kaore te karauna i aro atu ki a rātou i ngā āhuatanga whakahaere mo te whakataunga whakaaetanga.

Ko tā tētahi uri o Ngāi Te Rangi a Meremaihi Aloua, "Ko te aronga matua pea o mātou o te moana nei he aro atu ki ngā tukanga a te kāwanatanga kia whai wāhi ai ngā marae ki te pakanga Māori ki te Māori, koirā te take kua aro pūmau ki te kāwanatanga"

I karahuihui ai ngā mata rau ki te pā o Te Ranga hei maumaharatanga ki te pakanga i tū i reira i ngā tau kotahi rau rima tekau mā rua ki muri. I tahuna ngā ahikā, ā, i kōwaro te rohe i te tangi o ngā haka hei whakatauirahia te mana whena.

"Te whakamāro i te whanaungatanga i waenganui i a tātou e tautokohia ana tēnei mea te mana, tēnei mea te mana tangata, tēnei mea te mana whenua, tēnei mea te mana motuhake." - Aloua.

Ko tā Meremaihi, ko te hiahia o Ngāi Te Rangi kia tūtuki a Hauraki i o rātou kerēme engari kia tangohia te wāhanga ki a Tauranga Moana.