Kaupapa: Parekura Horomia

Kua ū atu te tūpāpaku o Parekura Horomia ki Hauiti Marae

  • Te Tai Rāwhiti

Rere ana ā-hūpe, ā-roimata i te hokinga atu o te tūpāpaku o Parekura Horomia ki tōna ūkaipō ki Hauiti Marae.

Ahakoa te marangai, he tini tāngata tonu i tae atu ki te whakanui i tō rātou hoa, whanaunga hoki.

Pōhiritia ana he ope, ka kore e roa, he ope anō e tatari ana ki waho.

Ā, hei whāngai i ngā manuhiri, kua puta katoa te iwi ki te hāpai i ngā mahi ō-muri.

I runga i te mōhio he rangatira kua riro nei, kua horahia ngā kai a te rangatira tonu.

Whakahīhī katoa ana Te Tai Rāwhiti mō āna tikanga manaaki tangata, ā, i kitea mārika tērā āhuatanga.

Inā te mahi nui a ngā ringawera i tēnei wiki, e mōhiotia ana, he nui ake anō ka eke hei te rōanga atu o tēnei wiki.