Kaupapa: Tūhoe

Kua tūwhere te ratonga hauora tuatahi ki roto o Tūhoe

Mere McLean
  • Waikato/Te Waiariki

I tuwhera te tuatahi o ngā ratonga hauora e whā ki roto o Tūhoe i te rā nei ki Tāneatua.  Ka noho tēnei hei tauira mō te hikoi a te iwi ki te whakatū i tōna whare mana motuhake. 

He whare kai hou hoki i whakatuwherahia, ko "Moumou Kai" tōna ingoa.

Tekau mā whā tāra te utu mā Tūhoe ki te kite i te tākuta ki tēnei ratonga hauora hōu.

Hei tā Patrick McGarvey, te heamana o Te Komiti o Runga, “No waho te tākuta, ā, engari he pānga Tūhoe wētahi atu ō ngā kaimahi ko te mea nui kei te whiwhi āwhina ngā whānau.” 

Toru tekau mā rua mano te rahi o Tūhoe, heoi waru tekau paihēneti o rātou kei waho i Te Urewera e noho ana. 

E ai ki a Patrick McGarvey, “Kei te tirotiro ētahi huarahi kia āwhina i a rātou kei waho i te rohe pōtae, engari mātua ko te whai kaupapa pēnei hei hāpai ake i ngā whānau ō te kainga.”

Nā te whakamanatanga o te pire o Tūhoe me Te Urewera, koinei tētahi o ngā hua kua puta.

Hei tā Tuku Morgan, “Kia kite mai ngā tauira o ngā hapū, o ngā whānau o Tūhoe i ngā tino mahi ka tāea te oti, mena he kotahi ana te whakaaro.”

I whakatūwhera hoki a Tūhoe i to rātou whare kai hōu a "Moumou kai"

Kua tū te tuatahi, ka tū te tuarua ki Te Waimana Kāku.