Ngā kaupapa: Entertainment, Arts

Kua tūwhera te whare tapere a Ruapōtaka e kīa nei ko "Te Oro"

  • Tāmaki Makaurau

Ko te whare tapere o "Te Oro" tērā kua tūwhera nei i ōna tatau ki te hapori whānui o Ruapōtaka, he wāhi e taea e te hunga rangatahi te whai i o rātou momoeā, i roto i ngā mahi whakatangitangi, waiata, kanikani, mā te whakamahi i ngā taputapu hangarau o tēnei ao hōu. 

Muramura ana ngā karu o ēnei tauira i te kitenga i ngā momo āhuatanga me ngā mātauranga ka taea e rātou te whai i tēnei whare.

Hei tā Anahera-Pono Tutengaehe, “He rongo i te wairua, he rongo i te āwhina o te hapori kia tātou e noho taiohi nei, e noho ana i raro i ngā Māori.”

E ai ki a Olivia Muliaumasealii, “Tino koi ngā tauira i tae mai i te rā nei, i waiata mai rātou, ka whakārohia me pēhea te tāpiri atu i ngā pikitia ā-rorohiko nei.”

Nō tērā marama i takia ai ngā karakia mō te whare me te whenua, ahakoa kāre anō kia oti te hanga i te whare i taua wā.

Nō te rā horoi tonu nei ka tūwherahia ngā tatau ki te katoa, ka whakanuia tōna hanga, ā kua whai wā inaianei ki te whakātu ki te hapori i ōna painga.

E ai ki a Tamati Patuwai, “Ko ahau tētahi o ngā kaimahi i konei, ko tāku i konei kia tautoko ai ngā tamariki, ngā rangatahi o Glenn Innes tae atu ra ki Panmure, Tāmaki nei, i roto i tēnei pukenga āku o te mahi a rehia, te whare tapere.”

Ko te tūmanako, kia aro mai te hunga taiohi ki te whai i o ratou moemoeā, ki te whakapakari i o rātou pūkenga, kei roto tonu i a rātou e tatari ana kia puāwaitia.

Hei tā Patuwai, “He kaha āwhina i a Ngāi Māori kia puta ki te whai ao, ki te ao mārama, kia mārama tonu ki ngā mātauranga a tērā, a tērā.”