Kua tūwhera te whare pūngao puia o Ngatamariki

Mere McLean
  • Waikato/Te Waiariki

Ko te whai a te Kāwanatanga, ka eke ana ki te tau rua mano, rua tekau mā rima, ka waihangatia te 90 ōrau o ngā hiko o Aotearoa, ki ngā pūngao oranga noa. 

Ā, i runga i tērā whai, i tūwhera te whare pūngao puia o Ngatamariki i te rā nei, he kaupapa i tutuki i ngā whakapaunga kaha a te Poari Kaitiaki Māori o Tauhara nama rua me Mighty River Power.

Waru tekau mano ngā whare ka whai hiko nā ngā hiko e rere mai ana i tēnei whare, he wāhi tuku iho ki te Māori.

Nā te mahi tahi a Mighty River Power me te Poari Kaitiaki Maori o Tauhara ki te raki nama rua e hāngai ana ki te hiahia a te Kāwanatanga mā Aotearoa tonu te iwa tekau orau o ōna hiahia hiko e rato, heoi ahakoa rā, e piki tonu ana te utu mō te hiko.

Wha rau, rima tekau ngā tūranga mahi kua whakatūhia nā tēnei whare hiko, mō ngā kaipupuri o te poari kaitiaki o Tauhara ki te raki Nama2 ko te kimi huarahi e hoki ai ngā hua ki a rātou te whāinga nui.

Koinei te whare hiko puia tuatoru o Aotearoa, e whakamahi ana i ngā puia whitu ko te mea nui e titiro ana ki te oranga tonutanga o aua puia mō ngā rā kei tua.