Kaupapa: Environment

Kua tukuna te kaiporotēhi rākau kauri i raro i ngā tikanga utu here

Wepiha Te Kanawa
  • Tāmaki Makaurau

I tukuna te kaiporotēhi rākau kauri i Titirangi a Johno Smith i raro i ngā tikanga utu here i te kōti ā rohe o Waitākere mō tana noho poka atu ki tētahi wāhi rāhui.  E whakahē ana a Smith i tana hāmenetanga, engari e whakaae ana ia i hē tana mahi.

Whai muri i tana noho ki runga rākau kauri mō te tekau mā toru rā, koinei te otinga mā Johno Smith me tana porotēhi.

E whakapono a Smith, ko te tikanga mā ngā rōia kē te mahi tiaki i ēnei rākau kauri, ehara māna.  Ko tāna, ehara ko te kauri kotahi nei e raru ana, ko ngā rākau huri noa i te motu ērā e raru ana.

E kōrero ana ia mō ngā rākau tahi rau rima tekau ki ngā ngahere o Waitākere e noho whakaraerae ana.  E whakaae ana ngā kaihanga whare a John Lenihan rāua ko Jane Greensmith nā rāua ngā tohutohu ki te koripi i te kauri ki te huarahi o Paturoa, ahakoa i runga tonu a Johno e noho ana.

Hei tā Smith, ko te mahi a (John) Lenihan e tīhaehae ana i te kiri o te rākau, tērā e whakararu nui ana i te kauri rā.

Kua hoki anō te kōti ki te whakawā i te whakaae mō te poronga o te kauri. Ināianei kua uru mai te mana whenua me te manako ia kia whakarauoratia te rākau.

Ko te tūmanako hei tā Smith, ka ora pai tonu te kauri nei mā ngā momo rautaki whakaora i a ia.

I tēnei wā kei te tiaki te mana whenua i te rākau kauri, ā, te rua tekau o Kohitātea ka hoki mai a Johno Smith ki ngā kōti ki reira tuku ai i tana tono.