Kua tukuna a Luke Tipene kia moe i tōna moenga roa

Wepiha Te Kanawa
  • Te Tai Tokerau

Kei ngā rau te tokomaha o ngā tāngata i karapinepine atu ki Ahipara ki te tangihanga o Luke Tipene, tekau mā ono ngā tau ka ngaro nei. 

I mate te mahuri tōtara o te ao rīki i waho ake i tētahi ngahau i te taone o Tāmaki Makaurau i tērā wiki.

I kōrerotia e te whakaminenga ki Roma Marae, te utu nui o te rironga o Luke me te ōhāki ka waiho ake i a ia. He ope nō te haukāinga i haka ake ki te pōkai pani i kawe rā i a Luke ki Whangarei Urupa, ki tōna takotoranga whakamutunga i te taha o tōna matua.

Kua tū te taiohi, tekau mā ono ngā tau, kua whakapaea mō te kōhurutanga o Luke, ki te Kōti Rangatahi, ā, kei ngā ringa o te ture ia e puritia ana kia tū anō ia ki te Kōti Teitei ki Tāmaki Makaurau hei te paunga o te marama.