Kua tukuna e Peeni Henare tōna ingoa kia tū ia hei māngai mo Reipa

Dean Nathan
  • Te Tai Tokerau

E mea ana a Peeni Henare he tika te wā kia whiu atu tana ingoa ki te potae o Reipa hei kaitono mo te turu o Tāmaki.

Hei tā Peeni Henare, “I au e tupu ana e hiahia ana au ki tēnei momo mahi.  I tupu ahau ki roto I tēnei ao te mahi torangapu ngā nekenekehanga o te ao Māori noreira ka whakaaro ake ahau ae. Kua pakeke ngā whakaaro kua maro nei ano hoki te tuara noreira ko tēnei te wa.”

Kei Taitokerau tēnei uri e noho ana engari e hia kē ngā tau ko te tonga o Tāmaki tōna kainga.

He hekenga no ngā kawai rangatira kua poipoitia a Peeni e tōna iwi hei kaiārahi a tōna wā.  A, no te kitenga i te makeretanga mai o ngā tuakana me te takaroa o ngā whiriwhiringa ka tatū ia Peeni ko tae te wa mōna.

“Ki te iwi o Tamaki otira ki a tatou te iwi Māori me kaua e noho kainga a te Hepetema e tu mai nei.  Hāere atu ngā tangata katoa ki te tuku pōti ki roto I ngā rohe katoa ka whai reo te iwi Māori ki roto I ngā mahi torangapu e hāere ake nei.”

Hei te Ratapu hui ai te komiti whiriwhiri o Reipa ki te whakatau ko wai ka hua ko wai ka tohu.