Kaupapa: Christmas

Kua tuaritia te aroha e te hāhi New Hope Community

Aroha Treacher
  • Te Tai Rāwhiti

Ka rangona ngā taumahatanga o te wa kirihimete e ētahi tini whānau puta noa i te motu, no reira, huhua ana ngā roopu karaitiana e toro atu ana i o rātou ringa awhina, kaua noa i te wa kirihimete, engari i te roanga o te tau, a, ko te hahi a-hapori New Hope ki Heretaunga tētahi ohu e penei pū ana.

Ia Turei e werawera ana ngā ringawera i te kauta o te hahi hapori New Hope, i a rātou e whakarite tina utu kore ana.

He oranga ngakau te kai mahana nei ki te hunga kei te takiwa o te kotahi rau e kimi āhuru mōwai ana i tēnei wahanga o te tau.

E rua tau ki muri i timatahia tēnei kaupapa e Lisa raua ko tona hoa rangatira ko Kurt. Ka tutuki te kaupapa tina nei i te kotahi rau tāra noa me ētahi kai kua takohatia.

Ka tuku tonu te hāhi i tēnei kaupapa hei tera tau, a, ko te hiahia kia whakaritea hoki he ratonga whakahaere putea, engari, i tēnei wa, he wāhi tēnei mo te hunga pohara kia rongo ai i te harikoa, kia tau ai te wairua i te wa o te kirihimete.