Kaupapa: Politics

Kua tū te ringa o Nanaia Mahuta kia tātaki i tana rōpū

  • Waikato/Te Waiariki

He tuakana Māori o te Rōpū Reipa kei te whai hoki kia tātaki i tana rōpu.  Ko Nanaia Mahuta tērā kua tuku i tōna tono ki te whakataetae mō te tūranga kaiārahi o te Rōpū Reipa.

Nō te haurua haora kua taha, kapi ai te wāhanga tuku ingoa ki te whakataetae, ā, ko te mema pāremata tērā mō Hauraki-Waikato, uri hoki o te whare ariki o te Kīngitanga kua whakatū i tōna ringa.

Kāti he whakatau ohorere ka tika.  E mōhiotia ana i te rima karaka i te ahiahi tonu nei i kapi ai te wāhanga tuku ingoa mō te tūranga kaiārahi o te Rōpū Reipa.  I te whā karaka rā anō i karangatia te karere take tōrangapū mō Te Kāea, a Maiki Sherman, ki te tari o Nanaia Mahuta, ki reira whakapuakitia tēnei whakatau āna.

E mōhiotia ana nā Louisa Wall raua ko Su'a William Sio te tīkiti tautoko i te tū o Nanaia Mahuta i waitohu.  He tohu tēnei o te kaupapa kua tū ai te ringa o Nanaia, hei tāna, kia whai reo kaha ai ngā iwi Māori, Moana-nui-ā-Kiwa hoki i roto i te anga whakamua o te rōpū.

E ai ki a Nanaia Mahuta kei a ia ngā pukenga mō te tūranga, me te whakakotahi i te pāti.

E mōhio ana te kāhui Māori me whai hua, kia kaua e moumou ai te tautoko a Ngāi Māori i a rātou.

I tēnei ata i tohu a Meka Whaitiri i tōna aro nui ki te taumata ō-runga - i hui tahi ia ki tana rōpū rohe pōti, kei te pīrangi rātou ki te kite i tētahi kaiārahi Māori.

Heoi, ko Nanaia Mahuta tērā i tohua i te hui a te kāhui Māori i tēnei rā.  Ā, mō te hunga whakaparahako i tana whakapau kaha - kotahi tana kōrero.

Hei tā Nanaia Mahuta, “Mēnā he kiko ki aua kōrero, kāre e taea te noho ki roto i tēnei wāhi.”

Mō te taha ki te toenga o ngā kaitono, kei te kite hoki rātou me whai hua te kāhui Māori.

Mā te wā tātou ka kite he aha ngā whakaaro o te marea, otirā o ngā mema o te Rōpū Reipa ki tēnei tū o Nanaia Mahuta.  Ka kōkiritia ināianei ko ngā hui ā-motu, ki reira whai wāhi ai ngā kaitono ki te whakatakoto i o rātou kaupapa.