Kua tū te kaimahi kaunihera kuti pātītī ki mua i te kōti ā rohe o Heretaunga

Aroha Treacher
  • Te Tai Rāwhiti

E whitu tekau mā rua tau te pakeke o tētahi kai-mahi o Te Kaunihera o Heretaunga i tū ki mua i te aroaro o Te Kōti ā-rohe o Heretaunga i te rā nei, mōna kua whakapaetia mō te matenga o Uetaha Ransfield Wanoa, e whā tau tōna pakeke, i tētahi aituā kuti pātītī i Camberly, i te marama o Whiringa-a-Nuku ki muri nei. 

I te tākaro tahi a Uetaha me ētahi whanaunga i te papa rēhia o Kirkpatrick i Camberly, ā, i whakatūpatohia rātou e te kai-kuti pātītïī kia kaua e whakatata atu ki te pūrere kuti. Hēoi kāore i taro, ka riro a Te Uetaha i ngā rau o te pūrere kuti, nāwai ka mate. He aituā tēnei kua ngau nei i te hapori whānui.

I te Kōti ko tā mātou karere ko Aroha Treacher hei tāna, “Kua whakatapungia te ingoa o te tangata mō te wä nei, ā, kua uhia ia ki te whakapae mō te hautū mōrearea i tētahi waka ā, mate noa ana te tangata. Kāore ia i rite ki te tuku i tāna whakautu ki te whakapae i te rangi nei, ā, hei tērā marama ia tū anō ai ki te kōti.

Ko tā Aroha kāore tētahi o te whānau o te pārurenga i puta ki te kōti i te rangi nei.  

Hei tā tētahi o ngā irāmutu o te kaimahi kaunihera ki tā mātou karere, e ngau kino nei te mamae ki tōna pāpā, e moe au-kore ana, kua pokea e te auhi, ā, kua tahuri ki te kai rongoa hei whakamahu i te pōkaikaha. Hei tā te iramutu, he aitua tenei e kore pea tōna pāpā e puta ai ki te ora.