Kua toromi tētahi tama Māori ki te ngutu awa o Waipū

Dean Nathan
  • Te Tai Tokerau

E māro ake ana ngā whakatūpato kia mataara ngā whānau i te taha wai, i te toromitanga o tētahi tama Māori, he tekau mā tahi ōna tau, ki te ngutu awa o Waipu, i Te Tai Tokerau i ngā haora tata nei. 

Ahakoa te rerenga o ngā ratonga ohorere ki reira, kotahi te tama Māori i riro i tēnei ahiahi i te kaha tō mai o te taitimu.  Engari i te rā nei i kōrero kē mai ētahi o te iwi kāinga me te hunga hararei i o rātou tino āwangawanga ki tēnei āhuatanga.

Ki ngā whakamārama ā ngā pirihimana, i pā mai tēnei aituā ahakoa ngā whakatūpato ki te karani pāpā o ngā tama tokorua.  Ā, waimārie noa iho ka ora mai te teina e whitu ōna tau ka mauria ki te hōhipere.  Ka mutu, nō te rā o te kirihimete ka toromi tētahi koroke hainamana ki tēnei one i tana haere ki te hopu pāpaka.

Me te aituā o te tangata hainamana ki Uretiti ka aroha, ka aroha.  Te mahi a Patuharakeke ko te kaitiaki ko te kaupapa o te kaitiaki.  Nā i tuku iho i ngā mātua tūpuna. 

Koinei te tuarua o ngā toromitanga ki tēnei one mai te rā o te kirihimete me te whakaaro o te hunga kua roa e hararei ana ki konei nā te tawhiti o te haere kua tae kē te wā kia whakatūria he ope tūturu hei whakaora i ngā tāngata ki te taha tonga o te one nei.

Nā te poto o te wā e tāria tonu nei kia puta katoa ngā whakamārama ā kia whakaīngoatia te tama kua riro.