Kua tohua ko Paora Maxwell hei tāhuhu rangapū hōu o Whakaata Māori

  • Tāmaki Makaurau

I whakapuakitia te tohutanga o Paora Maxwell hei tāhūhū rangapū hōu mō Whakaata Māori, he whakataunga kua wenerautia i raro i ngā whakapae, tērā ngā kōtititanga ā-ture i roto i te tukanga tohu a te Poari i te uri o Te Arawa.

Hēoi i te rangi nei me he uru maire te tū tahi mai a te Poari ki tāna whakatau me te wawata ia, ka whakanuia te ara whakamua e Whakaata Māori, i a ia e whakanui nei i tōna tekau tau.

Whakapūpū mai ana ngā mema o te Poari Matua o Whakaata Māori i te rangi nei, i te whakapuakanga a tō rātau Heamana a Georgina Te Heuheu, ko Paora Maxwell tērā kua tohua hei tāhuhu rangapū hōu i te ata nei.

Ākiri mārika ana a Te Heuheu i ngā whakapae kua tutū ake i te ao pāpāho i ngā marama tata nei e mea ana, i hē te ara tohu i a Maxwell ki te tūranga kua kapo i a ia.

Waihoki, i whakamāramatia e Te Heuheu he aha te Poari i kore ai i whai whakamārama i te tāhuhu rangapū o Te Reo Tātaki, i a Kevin Kenrick, mō tā Maxwell hekenga iho hei ūpoko whakahaere o te Tari Māori, Moananui-a-Kiwa o reira.

Māwhiti mai rā ki naianei, hei tā Maxwell, ko te ānganga whakamua kē te aronga matua mōna, otirā mō mātau ngā kaimahi o Whakaata Maori.

Hei āpōpō ka whakanuia e Whakaata Māori te tekau tau o rātou e tū ana, e mahi ana, e whakapāho ana "mā tātou”.