Kaupapa: Politics

Kua tirohia anō te Tāhuhu ki te whakakorenga ā ētahi ratonga pahi

  • Te Tai Tokerau

I tēnei tau i whakakore te Tāhuhu i ētahi ratonga pahi whai take nui, ā, kua mate ētahi tamariki ki te haere tawhiti mā raro, mā huarahi mōrearea hoki, kia kohia ake ai i tauranga pahi kē atu.  

He oranga ngākau i tēnei rā mo te tumuaki o tētahi o ngā kura e raru ana i te whakakorehanga ohorere a te Tāhuhu Mātauranga i ētahi ratonga pahi hei kawe i ngā tamariki. 

Ko tā Ken Timperley te tumuaki o te kura o Karetū, “mēna kua aro mai te Tāhuhu ki ā mātou karanga āwhina ae rā kua whakatikahia te nuinga o āku nei awangawanga.”

He tiaki moni te pūtake mo te whakakorehanga o ēnei ratonga e te Tāhuhu Mātauranga.  Heoi anō, e wehi ana ngā mātua kei riro he tamaiti kē te utu.

Ko tā tētahi o ngā whāea, ko Kelly Stratford “e tino mataku ana ia mo tāna tamaiti nā te mea i te nuinga o te wā kāre ngā kaihautū waka i te kite i ngā tamariki e hikoi ana he tere rawa hoki tā rātou hāere, nā reira he tino mōrearea taua āhuatanga mō ngā tamariki.”

Ko te kōrero i tēnei rā he hiahia nō te Tāhuhu Mātauranga kia ngaro rawa atu tēnei raru i te tirohanga kanohi.

Kā mutu, ahakoa te oranga ngākau ki ngā korero i tēnei rā, he whānui kē te rohe kua raruraru i tēnei kaupapa tiaki moni nā reira kia kaua e whakatika i tētahi tanga noa iho, ka mahue tonu te nuinga.

Ko tā Timperly ko te mea nui kia tū kaha ngā mātua ki te whakahē i te whakaritenga a te Manatū, mā tēra huarahi pea ka tāea te whakatika.”

I roto i ngā puehu e tutū mai ana, kua kitea anō i te pai o te kōrero tuatahi ki te iwi kainga.  

Kairīpoata: Maiki Dean Nathan.