Kaupapa: Netball

Kua tīmata te whakataetae poitarawhiti Lion Foundation ki Tāmaki Makaurau

Rahia Timutimu
  • Tāmaki Makaurau

Nō te rā nei huaki ai te whakataetae Poitarawhiti Lion Foundation ki Tāmaki Makaurau, kitea ai ngā kapa tekau mā whā nō te motu ki te whawhai mō te taitara matua.

Tata ki te iwa tekau tau tēnei whakataetae e whakahaerehia ana, ka mutu, ko te taumata kei raro iho i te whakataetae poitarawhiti ANZ, i konā kitea ai ngā kaitākaro toa o Aotearoa.

Nui ake i te tahi rau tima tekau ngā kaitākaro toa nō te motu whānui ka eke ki te kōti ki te whakaheke werawera ki te whare a Trust ki Tāmaki Makaurau i tēnei wiki.

Me te manako ka eke rātou ki ngā whiringa toa hei tēnei Rāmere, ki reira pakanga ai mō te taitara o te whakataetae.

Ko Ōtākou ngā kaipupuri o te taonga, i wikitōria i ngā wā karapīpiti e rua, i te tau rua mano tekau mā rua, i tērā tau hoki.

Ā, ko te āhua nei i pakari tā rātou tīmatanga i te whakataetae, ko Kapi Mana tā rātou hoariri tuatahi o te wiki.

Heoi anō, kāre i tuohu noa a Kapi Mana, i tā rātou kapa tētahi kaitākaro nō ngā Rarauwhe Hiriwa a Katarina Cooper, ko Elias Shadrock hoki nō te kapa Central Pulse.

Mō ngā tau tekau mā rima kua kore e kitea te kapa o Thames Valley ki tēnei whakataetae, heoi anō kua hoki mai rātou me ngā kaitākaro tekau mā rua.

He hiranga rawa te taumata tākaro i kitea i te rā nei,  kāre e kore, ko te manako o ngā kapa katoa, ki te eke ki ngā whiringa toa hei te Rāmere.