Kua timata te mahi poro rākau a Mā te Māori anō te Māori ka tika

Dean Nathan
  • Te Tai Tokerau

Mā te Māori anō te Māori, ka tika.  Koinei te aronga a ngā uri o Te Māhurehure i tēnei rā, nō te poronga o te tuatahi o ngā rākau paina ka hauhaketia i o rātou whenua i te riu o Waima, me te whai kia noho mai te nuinga o ngā hua o ēnei mahi ki te wā kāinga. 

Neke atu i te rua tekau ma ono tau ngā uri o Te Māhurehure e tatari ana kia tupu a rātou paina.  I tenei ra kei te whiriwhiri ko tēhea te rakau tuatahi hei poro.

Ko tā Andy Sarich, “I te wa ia mātou e tamariki ana koia tenei ko ta matou mahi e mahi tuporo engari e rerekē ano te wao nui a tane i tēra wā na koia tenei ko te rakau e tutu nei koia tenei ko te oranga mā ratou.”

Ki raro i te kaupapa mahingātahi a Taitoikerau Forests Limited me te tarahiti o Whakatere ki Koranui ko te timatanga tenei o te tua i ngā rakau o ngā whenua Māori neke atu i te whitu rau heketea ki te riu o Waima.

Na te kore o ngā rakau ngāwari i te ao whanui e meatia ana kua tino tika te mākete mo te hauhake paina.  Kei te takiwa o te rua tekau ma rima miriona tāra te wāriu o tenei kaupapa engari me te matapae, he nui noa atu te wahanga ka hoki mai ki te iwi kainga ma te urunga mai o ngā kaitono me ngā kaimahi no te wā kainga nei.

He mahi he oranga hoki mo te iwi o tenei kainga.