Kua tīmata te hīkoi whakahē i ngā mahi tūkino

updated
  • Tāmaki Makaurau

Kua tīmata te hīkoi whakahē i ngā mahi tūkino ki Te Hiku o te Ika, nō te ata nei i whakarārangi ake e te mema Māori o Te Tai Tokerau a Kelvin Davis i āna hoia kia kōrerohia te take nei ki nga wāhi katoa i te motu.

Ahakoa te ngau o te makariki me te mātao ki ngā kōiwi, nā te aroha ki te kaupapa wera i puta ai ngā kaitautoko hei whakamahana i te tira hīkoi.

Hei tā Kelvin Davis, “Ko tō mātou īngoa ko "Men Against Sexual Violence" mātou e akiaki ana i ngā tāne katoa kia kōrerohia mai mō tēnei māuiuitanga i roto i ngā hapori ara ko te tūkino tāne, wahine, tamariki, me tō mātou hiahia kia kore e huna tēnei ki raro i te whāriki i te mea ka kōrerongia tērā pea ka whakamōhiotia, ka tiaki tātou i o tātou whānau.”

Ki tā David Cunliffe, “He kaupapa pai tēnei me te wero anō kia whakamutua ngā mahi tūkino i waenga i te whānau, ko mea nui kia are taringa mai te iwi.”

E ai ki a Marama Fox, “Ko mātou tēnei o te Pāti Māori i tautokohia tēnei kaupapa, kia tū ngā tāne, ngā wāhine hoki ki te whakapuaki i ngā whakāro kia whakakorengia tēnei mea te patu tangata me ngā tamariki hoki.”

Me te mōhio anō ahakoa ko ngāi Māori te nuinga e whākina ana i roto i ngā tatauranga o ngā mea kino katoa, hei tā tētahi kaiāwhina mauhere ehara tēnei i te mate Māori.

E ai ki a Shane White, “Ehara i te mea he mate Māori engari ka tiro tonu te ao ki a tātou, pērā hoki i te tarukino te aha ranei, nō reira ka tika kia tū mai ētahi Māori kia whāki atu ehara i te mea he mate Māori tēnei, tēna pea he mate o ēnei rā, me ngā taumahatanga ā pūtea, ā mahi, ā aha ranei.”

Hei tā Vic Tamati, “Ko ahau tonu tētahi o ērā tāngata mahi kino, engari kua tae mai te wā kia huri te aro, me toro atu te ringa āwhina ki tētahi atu, me te kī atu ehara i te mahi pai.”

Ki tā Fox, “Ahakoa kua pā mai tēnei raru ki runga ia tātou te iwi Māori, ehara tēnei mā tātou anake, mō te katoa o Aotearoa whānui, ehara tēnei mō tētahi pāti i roto i te Pāremata, engari mō ngā pāti katoa kei roto i te pāremata, mō tātou katoa o te whenua nei.”

Otirā, neke atu i te whā rau kiromita ka takahia e ngā tira hikoi, mai i Tāmaki Makaurau ahu atu ki Te Rerenga Wairua, ka ruiruitia te kaupapa o Massive ki tēnā moka ki tēnā taone, i roto i ngā rā tekau mā whitu kei mua i te aroaro.