Kua tīmata ngā mahi whakapaipai ki Otautahi whai muri i te āwhā nui rawa o tēnei rautau

Aroha Treacher
  • Te Waipounamu

Kei te haere tonu ngā mahi whakapaipai, whai muri i te āwhā nui rawa i tēnei rau tau, i waipuketia ai te rohe o Otautahi i tēnei wiki.

E hia rau ngā whare e noho hiko-kore ana, ā, e hia hoki kua pākinotia mārikatia e te waipuke. He tōaitanga aitua tēnei mō te rohe, ā, ko te uru pounamu mō ētahi tini kainoho, he aha rā kei tua mō ratou?

Ahakoa kua tau te riri o Tāwhirimatea i te rangi nei, kāore ngā rangi paki e whakatau ana i ngā wairua ō te hunga kua pokea e ngā waipuke.

I hokona tēnei whare e tētahi whānau i roto i ngā tau e rua kua hori, ā, kua titia hoki ki ō rātou ngākau ētahi maumaharatanga motuhake mō konei, tae atu ki te whānautanga mai o tā rātou pōtiki, nō reira, ko te hiahia, kia noho tonu mai rātou ki konei.

E noho ana a Toby Ellis rāua ko tōna hoa wahine e hapu ana, ki tētahi o ngā tiriti i kaha pākinotia e te waipuke, otirā, kua mākū taritari te tūāpapa o tō rāua kāinga.

E matapaetia ana ka paki tonu ngā rangi tata e tū mai nei, nā reira ka whai wāhi ngā mātanga pūkaha ki te āta arotake me pēhea e kounga ake ai ngā rautaki karo waipuke.