Ngā kaupapa: Kapa Haka, Te Matatini

Kua tekau tau te rōpū o Ngā Tumanako e tū ana - Pūrongo Motuhake

Taroi Black
  • Tāmaki Makaurau

Hei āpōpō ka whakaeke atu te mātinitini ki Putaringamotu mō ngā whakataetae kapa haka ā motu.  I tēnei pō ka whakaaturia e mātou te pūrongo kapahaka whakamutunga, ā he rōpū nō te rohe o Tāmaki Makaurau, ara ko Ngā Tumanako. 

I waimarie a Taroi Black ki te whai i ā rātou mahi whakariterite inatata nei, kia tiro ake tātou.

Hei tā tētahi o nga kaiako a Kawariki Morgan, “Āpōpō tatū atu ai tōku rōpū a Ngā Tumanako ki ngā pākihi whakatekateka o Waitaha me kī ki te mura o te ahi.  

Kua tata mai te pāe tawhiti kua roa e whai ana.  Pāe tū pae hinga ko tā Ngā Tumanako he whakapau kaha mō te hemo tonu atu.”

Ki tā Jade Maipi, “Ko au tētahi o ngā kaiako o Ngā Tumanako, ko tētahi whainga nui mōku, nāku i whakatakoto ki mua i te aroaro o ngā kaihaka, ko tā rātou he whakaora i te wairua o ia o ngā waiata.  Ko tāu mahi he whakaora i te wairua o ia waiata kia rongo ai te āo.”

E ai ki a Mahanga Pihama, “Te Nuinga o mātou i kuratahi ai i te kura, i te kura kaupapa Māori o Hoani Waititi Marae.  Kāre mātou i puta i tēra porowhita, i tēra tapatoru rānei.

Ehara i te mea ka tino kitea te hunga pakeke i roto i te rōpū.  Ko ētahi o mātou, ahakoa he taiohi te āhua o te tinana, me āhua tipu huruhuru kia tū ai mātou ki runga i te papa whakataetae, ka pōhēhē ngā kaiwhakawā ehe he kura tuatahi kē tēnei.”

Ki tā Morgan, “Tēra tēra kōrero.  He kōrero kua whiua mai e ētahi he rangatahi tō mātou āhua.  Me taku whakautu ki tēna kōrero, he karo pea kei roto i tēna kōrero.”

Ko Makoha Nightingale Pene tērā e mea ana, “Ko Makoha Nightingale Pene tōku īngoa.  He uri ahau nō Tainui. Ko Ngāti Haua te iwi, ko Ngāti Werewere te hapū.  Tōku wā tuatahi i tū ahau ki te Matatini, i Rotorua.

Ko te kapa haka he ara mōku kia noho pū au ki te āo Māori. Kia noho ahau ki roto i ngā tāonga i tuku iho me e ō mātou tūpuna.”

Ki tā Maipi, “Kua tekau tau te pakeke o tō mātou kapa inaianei.  Nōreira mō mātou ko te whāinga matua kia riro ai e mātou i tētahi tūranga ki roto i ngā whiringa toa.”

Kua aha a Ngā Tumanako i ngā tau tekau?

E ai ki a Makoha Nightingale Pene me Te Raina Kaipara, “He nui ngā rerekētanga. Ko te tūmanako kua whanake hāere mātou.”

Hei tā Makoha Nightingale Pene, “Ko te Kapa Haka he mea e noho piri tata ana ki te ngākau kāore e kore ko te kapa haka te mea tiketike mōku.”

Ki tā Kawariki Morgan rāua ko Jade Maipi, “Mai a māua ngā kaiako kia koutou a Ngā Tumanako e mihi ana ki ā koutou kaihaka mai, ringa wera mai, tamariki mai.

Te Whānau whānui tonu o Ngā Tumanako i tēnei te tau tekau kua tū to mātou rōpū.”