Kua tau te whakawā a Te Kaporeihana Whare kia panaia tētahi whānau i tō rātou whare i Ōwairaka

  • Tāmaki Makaurau

Kua tau kē te whakawā a Te Kaporeihana Whare kia panaia a Raniera Kahui-Ariki rāua ko tōna tuahine a Waiata me āna tamariki i tō rātou whare i Ōwairaka hei te Rāhina e heke mai nei.

He tangata hauā a Raniera kei runga tūru wīra, ā kua whā tau kē a ia e whawhai ana i ngā whakapae whakatumatuma, me te arokore mai a te Kaporeihana ki ngā whakahē a te whānau nei.

Ināianei ko te kāinga kore pea te papa mō rātou.

E whitu tau te tungāne me te tauhine a Raniera raua ko Waiata Kahui-Ariki e noho ana ki konei, engari kua whā tau e tutū ana te puehu.

E ai ki a Waiata Kahui-Ariki, “Hei te Rāhine ka urutomohia mātou a te atapō, ahakoa i homai 12 rā hei rapu whare ki te Taitokerau, e whakapae ana au e panaia ana matou ki waho o tēnei rohe whai rawa.”

I te tīmatanga o te tau, ka tukuna te pānui pana, e iwa tekau rā me puta raua i te whare, na runga i ngā whakapae whakatumatuma, whakapae korekiko.

Ki tā Marama Kahui-Ariki, “Ahakoa pēhea tā mātou whakatakoto i te pono, me te haere ki a rātou hui, ki te whakahē i ngā whakapae, ka taringa māro tonu mai te Kaporeihana.”

Kua puta te whakautu a te Kaporeihana ā Whare ki ngā nawe a te whānau Kāhui-Ariki.

"E kore rawa e whakāetia e Te Kaporeihana ā-Whare kia whakatumatuma tētahi o a rātou nei kainoho ahakoa a mātou whakatūpato ka mahi tonu te kainoho.  Koinei anake te huarahi e toe ana kia mātou te pana i aia, me te mea anō, i hoatu e mātou he wā tāpiri mō rātou ki te whakatika i a rātou hapa auare ake."

E ai ki tana tuāhine, e taumahatia ana a Raniera i enei raruraru me ōna mamae hoki e here nei i a ia ki tōna tūru, wharanga ki te roro, me te uaua ki te rapu kainga, na kona ia kaore e hiahia ki te kōrero mai ā kāmera nei.

Hei tā Marama Kahui-Ariki, “Kei te panaia rātou, ka noho kore kainga, me huri pēhea rā, he uaua te rapu kainga mō te hauā.”