Kaupapa: Environment

Kua tau te haika o te waka Noble Bob Douglas

  • Te Tai Hauāuru

Nō te rā nei, ka tūtaki atu te kaipuke keri hinu nui, a Noble Bob Douglas, ki tētahi o ngā waka pere rua, mai i te kāhui o ngā waka e ono o Oil Free Seas.

Ko te Noble Bob Douglas tērā, i tonoa atu e Anadarko Aotearoa, ki te puna o Taranaki, kia kawea ake ngā mahi keri i te papa moana, he koni atu i te 100 maero te tawhiti mai i te Whaingaroa.

Ko tana rautaki, he keri i tētahi rua i raro i ngā wai, he kotahi mano e rima rau mita te hohonu.

No tērā wiki ka puta tētahi pānui i a Anadarko me te Kāwanatanga ki ngā kaihautū waka e mea ana, me wātea te takiwā o te rima rau mita atu i te tauranga keri.

Engari hei tā tētahi o ngā kaihautū o te waka Vega, i te mānu tō rātou waka i runga tonu i te tauranga keri hinu i te ra nei, engari i panaia rātou e te kaipuke nui, e Noble Bob Douglas.

E ai ki te ture, ka taea te hāmene i te hunga porotēhi, me he mea, ka uru atu tētahi kaipuke, ki roto i te takiwā o te 500 mita mai i ngā kaipuke keri hinu.

E kore ngā mahi keri e tīmata kia pau rā anō ētahi rā, nāreira i te wā nei kāore anō te aukatinga kia mana.

Hēoi, ka mana ana te aukati, ka mate ngā kaumoana o runga i te Vega ki te whakatau mēna rānei me tū tonu tō rātou hēteri, me whai rānei i tā te ture e mea ai.