Kua tatao te Taraipiunara o Waitangi i te riri mō ngā wātene Māori

  • Te Whanganui-ā-Tara

Kua takoto te paepae kouka, ā ko Te Rōpū Whakamana i Tiriti o Waitangi tērā kei waenganui.

Hei tā Maanu Paul “ko ngā tāngata e kukume ana i ngā taura o te karetao nē? Koia te rangatira?”

I tērā tau, i whakahaerehia e Te Puni Kōkiri ētahi hui ki te whiriwhiri i te ture Whakawhanake i te Hāpori Māori. I tēnei rā, e ai ki te Kaunihera Māori, kua hinga rātou i ngā wātene Māori.

Ko tā Maanu e mea ana “ko te tekau mā toru miriona taara e whakapaungia e te kāwanatanga, ahakoa i kii mai a Winitana wēnei moni mō ngā wātene”

Hēoi anō rā, e ai ki a Te Reo Hemi “he nui ngā whakaueuetanga kua pā mai, hōi kua oti tonu ngā mahi.”

Toru tekau ngā tau i noho a Te Reo Hemi hei wātene Māori i te rohe o Aotea. Ko ngā kōrero i puta i te rā nei kua noho hei tino kai mā te hinengaro mōna.

Ko tā Te Reo “mēnā ko tātou tonu te hunga whakahaere, ko te painga atu tēnā, hoi ko tā te ture ko te kaunihera ā-rohe me te Kaunihera Māori ngā kaiwhakahaere.”

Neke atu i te rua rau ngā wātene Māori i tae atu ki te marae o Pipitea i te rā nei, engari kāore te Minita o ngā take Māori, me Te Puni Kōkiri e taea ana te whakaputa i ō rātou whakaaro tae noa atu ki te putanga mai o te whakatau.

Kāti, ko te kōrero i puta i tā mātou karere a Ripeka Timutimu i te rā nei e mea nei hei ngā rā e toru e haere ake nei ka rāngona he korero i ngā kaitaunaki pērā i a Maanu Paul, rātou ko te tumu whakarae o Te Puni Kōkiri, ko Michelle Hippolite, ko Titewhai Harawira hoki hei māngai mō ngā wātene Māori i Tāmaki Makaurau, ā, kāre e kore ka tutū katoa nei te pūehu.