Kaupapa: Treaty Settlements

Kua tāmokohia e Te Kawerau a Maki te whakataunga tiriti me te Karauna

  • Waikato/Te Waiariki

Ko te mana whenua o Te Kawerau a Maki, ka timata ake ki Mahurangi, heke whakararo, ki te raki o te tonga o Te Kaipara, whakawhiti atu ki Tāmaki Makaurau, heke whakararo atu ki te tonga o te Manukau.

No te rā nei, ka tamoko ngā uri whakaheke o Tainui ki Tāmaki i ta rātou Whakataunga Tiriti me te Karauna.

Hei tā Te Warena Taua, heamana o Te Kawerau a Maki Iwi Authority, “He nui hoki ngā kaumatua, oku whaea, matua, i kaha ki te pupuru i te taonga nei, ki te whawhai, kia kokirihia te take nei ki mua ki te karauna.

“Na i tēnei wa, mō rātou me ngā mokopuna kei te hāere mai nei, kei te koakoa te ngakau” 

E kīa ana, horekau he marae ake tō Te Kawerau a Maki, nā, i roto i tāna whakataunga tiriti ka whakahokia ko:

  • Ngā pito whenua e 9, he 31 heketea te rahi.
  • I roto i aua whenua tonu, ko Te Onekiritea (Hobsonville) tēra ka riro hei whenua whakatuu marae ake mo Te Kawerau a Maki.
  • He 3 rau mano tāra hoki ka utua ki te whakatū i te Marae.

Hei tā Chris Finlayson, “Kei ia rātou he urupā, he pito whenua ano ki te whakatū marae mā rātou a he timatanga pai tēra mo te iwi, mēna ka mahi tahi rātou me ēra atu Iwi kei Tāmaki mei kore he hua nui ka puta mo te Iwi a ngā tau kei te heke mai."

Mō te taha ki te whakataunga ā pūtea ka utua ko te 6.5 miriona tāra me āna hua moni, ka hāpai ake ki te whakahoki atu i te 85 paiheneti o te Ngahere o Riverhead. 

Ko tētahi wā kainga, urupa hoki o Te Kawerau a Maki, kei Kopironui, i te ngahere o Woodhill.

Ko te whakahokinga o aua whenua, 39.7 heketea te nui, i murua e te Karauna, ka riro mā Te Kooti Whenua Māori tonu e whakatau.