Kua tae atu tētahi kororā ki te takutai o te Raki

Lynette Amoroa
  • Te Tai Tokerau

E rakuraku mahunga ana ngā kaitiaki manu ki te koanga i Whangarei mā hea ai tētahi momo kororā e kiia ana ko te Snares Crested i tae atu ki te takutai o Te Raki e hia maero nei te tawhiti i tana kāinga tūturu.

Tekau ma ono noa ngā momo kororā i te Ao, heoi ano he rerekē te kite ake i tēnei momo ki ngā wai mahana i Te Tai Tokerau.

Tata ki te ono kirokaramu te taumaha o te manu nei, ā, e whakapono ana ngā kaitiaki na te tai i whakakōtiti ai tana haere mai i te takiwā o te tonga o Rakiura.

Ā, mei kore ko tētahi kaihī ika i Pewhairangi i ora ai ia i tēnei rā.

Te āhua nei kua tau haere tana noho ki tana koanga hōu i Whangarei, ā, kua tapaina hoki ia ki te ingoa Burt Munro mō te kaieke motupaika rongonui.

Ka noho a Burt ki te taiwhenua mō te rua wiki, kia mutu rāno tana whakamaunu katahi ka ahei ia ki te hoki ki te wai anō.

I tae atu ia ki Te Raki me tōna kotahi, engari kua whakaritea kia whakahoki atu ā-tira ia ma runga waka rererangi ki Otepoti rāno hei tīpoka i tana kauhoe atu ki te kāinga.