Kua tae atu te mauri o Te Matatini ki roto i te Whanganui ā Tara

  • Te Tai Rāwhiti

Kua tae atu te mauri o Te Matatini ki roto i te Whanganui ā Tara i runga i tana haerenga ki te rohe o Ngāti Kahungunu.

Inapō rā pōhiritia e Te Atiawa me Ngāti Toa te waka o Te Matau a Maui me tōna taonga nui.

E toru rā e rere ana Te Matau a Maui mai i Ōtautahi ki Te Whanganui ā Tara.

Ā, he taonga whakahirahira te kawea.

Hei tā Hera Huata, “Tino kaupapa tēnei Te Mataini te whakahoki ki Ngāti Kahungunu ki heretaunga koira hoki te mauri o Te Matatini ki a tātou te iwi Māori kore noa nō Ngāti Kahungunu nā te iwi Māori te mauri o Te Matatini.

Koinei te taunga tuatahi o te mauri nō tāna wehenga i Te Waipounamu. Ā, ko te tūmanako kā haria ia ki ngā marae puta noa i te rohe o Ngāti Kahungunu.

E ai ki a Huata, “Ko te kaupapa nei o tēnā mauri kia hāpai mai e te iwi o ngāti kahungunu kia tu whakarangatira kia manāki mai i te iwi i te tini i te mano e haramai ana ki te  Heretaunga

Ki tā Haami Hilton, “Toru tekau kē ngā tau te wā i tū tēnei kaupapa i roto i a Ngāti Kahungunu nā i tēnei wā i whiwhi mātou i te mauri nei.”

Heoi e ai ki a Hera Huata, te mangai o Ngāti Kahungunu mō Te Matatini, mā te mahitahi a te iwi, kā taea e rātou te eke ki te taumata o te manākitanga i whārikihia e Ngāi Tahu i tērā wiki.

Hei tā Huata, “Kite atu i ngā tio, kina, paua, i eke mai nei ki runga i ngā tēpu, pērā anō hoki kia Kahungunu. Heoi anō kei a mātou ngā huarakau, ngā kai nō te whenua, koira tā mātou tino pukenga, tā mātou tino taonga.”

Kāre e kore he mahi nui kei mua te aroaro o Ngāti Kahungunu.