Kaupapa: Te Matatini

Kua tae atu te mauri ki Ngāti Kahungunu

Wepiha Te Kanawa
  • Te Tai Rāwhiti

Kei roto pū i ngā manaakitanga a Kahungunu te mana whakatū i te whakataetae kapa haka ā-motu, whai muri i te whakawhitinga ōkawa o te mauri o Te Matatini ki a Rākautātahi Marae i Takapau.  Koinei te taunga tuatahi o te kōhatu e haria haeretia ana ki ngā marae maha o Ngāti Kahungunu ki te Matau a Māui, i mua i tōna ūnga atu ki te taone e whakatūria ai te whakataetae.

Ehara i te toka noa, ēngari kē e pupuri ana i te mana kāmehameha o Te Matatini.  E ai ki a Don Hutana nō Ngāti Kahungunu, " Ko tēnei kōhatu, he kōhatu i haere ai ki ngā takiwā o te motu, i tēnei rā ka tae mai te kōhatu ki runga i tēnei marae o Rākautātahi, te marae tuatahi mai i te tonga ki tō mātou tae whenua o Tamatea."

He kaupapa mīharo kei te haere, hei tā te haukainga.  Hei tā Brian Morris, "Ka haria te mauri ki te tāone nei ki Takapau mō te wiki nei, ana ki te kura, ki te kōhanga reo.  Ka tū tētahi pō hei whakanui i ngā mahi kapa haka, ka haere atu te hapori, ngā tāngata o tēnei kainga ki te whakanui i te taunga mai o te mauri ki konei."

Ka noho ki waenga i a Ngāti Kahungunu tae noa ki te tau 2017, ā, e manako ana te haukainga ka tipu haere te aroha o te kapa haka ki waenga i te hapori.

E ai ki a Hutana, "Hei taoro atu ki tērā marae, ki tērā marae o tēnei takiwa he aha te kaupapa o Te Matatini, ki tae ai ngā rōpū nui kia uru atu ki Te Matatini."

I mea mai a Morris, "Ka tau atu anō te mauri ki tērā marae o tātou ki Porangahau, me tēnei mahi anō ka noho atu ki reira mō tētahi wā.  I kī mai a Hutana, "Me haere te toka nei ki nga marae o tēnei tai whenua, ā, kātahi ka haere ki te tai whenua o  Heretaunga me ētahi atu o ngā marae o Ngāti Kahungunu koira te kaupapa a wairua."

E karanga ana ki te hau kāinga kia tirohia te mauri, i mua i tana wehenga atu ki wāhi kē.