Kaupapa: Prison

Kua rewa ngā mahi whakatewhatewha mō te kohurutanga o tētahi tāne i te whare herehere i Ōtautahi

Heeni Brown
  • Te Waipounamu

Kua rewa ngā mahi whakatewhatewha mō te kohurutanga o Brenton Marni Parata, e whā tekau mā whā tau te pakeke, i patua ki te whare herehere tāne i Ōtautahi i tērā Raapa.

I te ata nei, i mate ia i rō hōhipera, whai muri i te whakawetonga o te mīhini hāpai i tōna ora i te Rātapu.

E ai ki a Mark Worner, pirihimana mātāmua kua whakapikihia te taumata o ngā whakatewhatewha hei aromatawai kōhuru whai muri i te matenga o Brenton Marni Parata i tēnei ata.

E ai ki ngā whakamārama kua tae mai ki a Te Kāea, i patua a Parata ki tōnā rūma mauhere ki te Whare Herehere o Ōtautahi.

Ā, nō te Rāhoroi tonu ka mutu te aromatawai ki te wāhi mauhere i mate ai a Parata.  Ā, ahakoa kua puta ētahi rīpoata e pā ana ki ngā hara o mua o Parata, kāhore anō ngā Pirihimana o Waitahā kia whakaputa kōrero noa, i te moata hoki o ngā mahi whakatewhatewha.

Heoi anō ki te taha ki ngā whainga o ngā mahi whakatewhatewha, kahore anō kia whakatauhia tētahi taima e puta mai ai ngā whainga, engari tā ngā pirihimana ka roa hoki te wā mō te putanga mai o tēnā ripoata rā.