Kaupapa: Education

Kua reri Te Pīhopatanga o Aotearoa ki te tuku whakapāha

  • Tāmaki Makaurau

I whakaae Te Pīhopatanga o Aotearoa o te Hāhi Mihingare kia tuku whakapāha atu ki ngā tauira ō-mua, ngā whānau hoki o ngā kura o Wikitōria me Tīpene mō te āhua i kati ai aua kura.

Ko te hohou i te rongo te pūtake o te mahi a te Hāhi Mihinare, engari kāre i kitea taua āhuatanga i te katinga o ngā kura o Wikitōria me Tīpene.

Hei tā ngā whakamārama a Debra Jensen, kāre ngā mahi i oti i runga i te "wairua pai".

Ā, kua whakaae Te Pīhopatanga o Aotearoa kia tuku whakapāha atu ki ngā tauira ō-mua, ngā whānau hoki mō te katinga o aua kura.

E whakapono ana a Ātipihopa Brown Turei, mehemea nō te Pīhopatanga te hē mō te whakakore ngā kura e rua, kei a rātou te hara.

I ngā wiki kua hipa hui ai ētahi o ngā tauira ō-mua o Tīpene ki te papa i tū ai te kura, ki te whakahoki mahara, me te aha i mārakerake kitea te mamae e kaikinikini tonu ana i a rātou mō te katinga o te kura.

Hei tā Ātipīhopa Turei, koinei te huarahi hei whakatika, hei whakahihiko anō i te wairua kia tau anō ngā kura nei, kei reira Te Pīhopatanga o Aotearoa e whakaae ana.

I ohorere a Hone Harawira, tētahi o ngā tauira ō-mua o te kura o Tīpene, ki ngā whakatau a Te Pīhopatanga o Aotearoa, engari ki tāna me mahi ka tika.

“Kia mau ki te whakapāha engari i te putanga mai i te rīpoata o te poari kia whakawātea i te pūtea kia whakatikangia i ngā whare kia puare anō ngā kura.”

Ka pātai atu a Ms Jensen ka aha ināianei inā kei a rātou te whenua me ngā whare?

Kāre a Ātipīhopa Turei e mōhio ana āhea rātou ka tuku whakapāha atu ki ngā whānau o Wikitōria rāua ko Tīpene, engari he tīmatanga pea mō te murutanga o o rātou hara.