Kua rapua te tokorua o tētahi pane kuini tawhito

Taroi Black
  • Tāmaki Makaurau

E rua tekau mā whā haora ki muri nei, i te kimi haere a Air New Zealand i ētahi kōrero mō ngā kōtiro Māori e rua ka kitea ki tētahi o ngā pane kuini hōu e whakanui ana i tōna tau whitu tekau mā rima.

Hei tēnei wiki, tīmata ai te hoko atu i ngā pane kuini hōu, nā reira, i toro atu a Te Kāea ki te iwi whānui, ki te rapu i a rāua.

Kua oti te rapunga nui, ā kua kite a Air New Zealand i ngā mātua o ngā kōhine tokorua, i hopungia ake ki tēnei whakaahua i te tau whitu tekau mā whitu o tēra rau tau.

Nōnanahi nei i puta te tono a Air New Zealand e rapu ana i te hunga nei, ā, ka tāpiritia tō rāua pikitia hei whakanui i te huritau whitu tekau mā rima o te kamupene waka rererangi. 

I whakaahuahia tēnei pikitia mō Felia Tumahai rāua ko Sonia Wiggins i te wā i pakanga tā rātou iwi o Ngāti Whātua ki Orākei mō te mana whenua o Takaparawhau.

I mate a Sonia Wiggins i te tau ruamano tekau mā toru nā te matepukupuku. He wahine i arohaina e tōna whānau.

Ka whakawhiti mai a Felia Tumahai i Ahitereiria, ā, ka haere ngātahi a ia ko ōna mātua ki Te Papa, ki reira whakaaturia ai te whakaahua.