Ngā kaupapa: Kapa Haka, Te Matatini

Kua puta te rārangi kaiwhakawā mō te taiopenga nui o Te Matatini

updated Te Kāea
  • Te Waipounamu
Te Matatini Kapa Haka Aotearoa

Rua tekau mā ono ngā kaiwhakawā kua tohua e te Kōmiti ā-motu o Te Matatini hei pae whiriwhiri ki te taiopenga nui ka tū ki te pāka o Hagley, i Ōtautahi hei te Poutūterangi e tū mai nei.

E ai ki tētahi karere pāpāho i puta i te rā nei, kua kōrerotia te heamana o Te Matatini a Selwyn Parata, "mā ngā kaiwhakawā e aromatawai i ngā kapa whā tekau mā rima toa o Aotearoa, o Ahitereiria whānui kia whiriwhiri ko ngā te toa whakaihuwaka."

E rima tēkau mā rima katoa ngā tono i tukuna nō ngā rohe tekau mā toru i whai wāhi atu ki ngā whakataetae ā-rohe i tēnei tau.

Hei tā Parata whakatau anō, hakoa rua tekau mā ono ngā kaiwhakawā i tohua, rangatira katoa ngā kaitono.

Kua whakaingoatia ko ngā kaiwhakawā mō ngā wāhanga nei, arā, te Waiata Tira, te Whakaeke, te Mōteatea, te Waiata ā-ringa, te Poi, te Haka, te Whakawātea.  Heoi, i tērā tau i whakatauria e Te Matatini kia tū te wāhanga o Te Reo hei wāhanga whakahiato, ā, mā ia kaiwhakawā e whai wāhi atu ki te tuku piro mō taua wāhanga.  Tirohia te pūrongo a Amomai Pihama mō te whakamanatanga o Te Reo hei wāhanga whakahiato.

Nei hoki te arahono ki te puka ture o Te Matatini, rapua te wehenga 4.4.3 mō ngā kōrero whakamahuki o te ture hōu nei.

Ki ngā Wāhanga Whakahiato:

Whakaeke - Haani Huata, Tui Ransfield, Hemi Tai Tin, Pouroto Ngaropo

Mōteatea - Georgina Kerekere, Turuhira Hare, Mauriora Kingi, Ruka Broughton

Poi - Huia Julie Hahunga, Leanne Morehu, Ngamoni Huata, Te Atarangi Whiu

Waiata ā-ringa - Hema Temara, Kuini Moeahu Reedy, Leon Blake, Puka Moeau

Haka - Joe Harawira, Maihe Nikora, Mark Kopua, Muriwai Ihakara

Whakawātea - Pania Papa, Tihi Puanaki, Chris Winitana, Watson Ohia

Ki ngā Wāhanga Whakahiato-kore:

Kaitātahi Wāhine - Hema Temara, Kuini Moehau Reedy, Tihi Puanaki, Turuhira Hare

Kaitātaki Tāne - Hemi Tai Tin, Joe Harawira, Mauriora Kingi, Muriwai Ihakara

Kākahu - Te Rangi Hemi, Tui Ransfield, Mark Kopua, Tei Nohotima

Waiata Tira - Leanne Morehu, Te Rangi Hemi, Leon Blake, Watson Ohia

Ka tū te taiopenga mō ngā rā e whā mai i te 4-8 o Poutūterangi, ā, ka hautūtia e Te Kaunihera Ahurea o Waitaha, me te tautoko hoki a Te Rūnanga o Ngāi Tahu me te Kaunihera ā-Rohe o Ōtautahi.

Ka hoko ngā tīkiti ki te paetukutuku nei, ki www.tematatini.co.nz