Ngā kaupapa: Politics, TPPA

Kua puta te matekiri nā te whakatau mai i tāwahi mō te whakaaetanga TPPA

Heta Gardiner
  • Te Whanganui-ā-Tara

Tērā te whakatau mai i a Chile, ka hainatia te whakaetanga TPPA e ngā whenua tekau mā rua hei te tuawhā o Huitanguru ki konei, ki Aotearoa.  Engari ko te pātai a te nuipuku, he aha rā te take e rongo ana tātou i ēnei whakamāramatanga mai i tāwāhi.  

He whakatau whakahirahira.  Ēngari kei hea te reo o te kāwanatanga? 

Hei tā Marama Davidson, "Kāore au i te ohorere, ki tēnei ka puta mai i te pānui nō Chile kē."

Kei te puku te rae o te Pāti Kākāriki, ki te whakatau e ai ki a rātau, he mahi muna kei te haere, e pā ana ki ngā whakaritenga mō te TPPA. 

Ko te take e whiu kōhatu ana rātau, ko te whakaputanga, ka hainatia te TPPA ki roto o Aotearoa, hei te tuawhā o Huitanguru.  Engari kei te mōhio noa te marea o Aotearoa i taua whakaritenga, nā te whakapuakanga mai i Chile. 

"Ko tēnei te āhua muna, o te whakaetanga katoa nē," te kii a Davidson.

Ko te āhua muna o ngā whakaritenga tētahi take, kua kaingia kahatia te kāwanatanga, e ngā koko maha o te whare o te whenua hoki, mō te TPPA. Ēngari, he tohu tēnei whakapuakanga, kua tata tae te waka ki uta. 

Ēngari, hei tā Davidson, kia kaua e mate wheke noa, "Haere tonu!  Haere tonu!  Me whawhai tonu mātau, mō āke tonu atu."

He karanga, kei te toro atu, ki a Ngāi Māori.

"Kei a mātau ngā hapori, ngā whānau, ngā hapū, te mana mō ia rohe. Kaua e waiho i tērā rangatiratanga ki ngā kaporeihana nui o te ao," hei tā Davidson.

Ki te hainatia te TPPA, ki honohono atu tērā i ngā whenua tekau mā rua, kia māmā ake ngā mahi tauhokohoko, i waenganui i a rātau.