Kaupapa: Ngāpuhi

Kua puta te karanga kia tinihia nga kaiarahi o Ngapuhi

updated Dean Nathan
  • Te Tai Tokerau

Kua tae te waa e makere a nga tino kaiarahi o Ngapuhi i o ratou ano turanga. Koinei ta tetahi o nga heamana takirua o Te Kotahitanga o nga hapu o Ngapuhi i te putanga o nga korero mo te $6M kua whakapaua e Tuhoronuku i runga i te ara whakatatu ia Ngapuhi engari kahore e hua.  

E ko ta Pita Tipene ko rite ia ki te whakataha i a ia ano i tana turanga, "E hia kee tau e hia kee raruraru e hia kee pakanga aa kua pau katoa tena ono miriona taara, kahore kee e kite ana tetahi painga mo Ngapuhi.  Nareira e titiro atu ana ki nga kaiarahi kua tae kee ki te waa ki te tini i nga tangata e taraiwa ana i tenei pahi."

He wāhanga iti o taua ono miriona taara i riro ma Te Kotahitanga o nga hapu o Ngapuhi, na ratou hoki i arahi i te huhua o nga kereme ki te aroaro o te taraipiunara.

Hei ta Tipene, "E hoa kua hoki ano ki tena korero kia tu tika ai te whare tapu o Ngapuhi.  Engari na nga mahi a Tuhoronuku i hee te whakatakoto i te papa o te whare na e ngahoro tonu nei e ngahoro tonu nei i hee te whakhaere e hee tonu nei.  Me tiningia tetahi mea na e mea ana ahau ko nga kaiarahi kee ko ahau ano tetahi.  Me neke a Pita Tipene ki te taha me neke a Sonny Tau ki te taha."

Ko tā te heamana takirua o Te Kotahitanga o nga hapu o Ngapuhi, ara atu ano nga tangata o Ngapuhi Taniwharau hei mau i tenei kaupapa ki tona otinga, "E momona kee ana nga warati a wetahi tangata i runga ano i era whakahaere me te mohio hoki ko ena kaiarahi e mohio ana i te papai o te kakara o nga moni.  Nareira ehara kee ko nga moni i te mea nui engari mahia te mahi mo Ngapuhi kia tika kia tutuki."