Kaupapa: Politics

Kua puta ngā whakapae a Winitana mō te Whānau Ora

  • Te Whanganui-ā-Tara

I te Whare Pāremata i te rangi nei, i tū anō te pū o Winitana Pita, ā, ko te Minita o Whānau Ora a Tariana Turia i tōna keo.

Ko te kaupapa, ko ngā whakapae kua rewa ake mō ngā tohanga pūtea a te Minita ki ngā kaitāpae tono hei komihana mō Whānau Ora.

E rua ngā whakapae matua a Winston Peters i roto i tēnei taupatupatu.  Ko te tuatahi, he kirimana haurua miriona tāra te wāriu i waenga i Te Puni Kōkiri me te NHC.  Ko te tuarua, he pūtea toru miriona tāra i tukuna ki Te Kāhui Rangatira ā-Iwi.  E ai ki te kaiārahi o Aotearoa Tuatahi, katoa e whakapakari ana i ngā tono a ngā rōpū e rua ki Te Puni Kōkiri mō te kaupapa Whānau Ora, otira tā rātou whai kia riro i tētahi o ngā kirimana e toru hei komihana mō te kaupapa.

Ko te rauna tuarua o te pakanga Whānau Ora, ā, te āhua nei kua whiore hume a Winston Peters mō te whakapae he toru miriona tāra i tukuna ki Te Kāhui Rangatira ā-Iwi e te Minita Whānau Ora.

Tūturu i roto i taua īmera a Sonny Tau e meatia ana:

"E hiahia ana mātou te toro atu ki ngā rauemi me tētahi kaituhi pūrongo e ai ki tāu i tāpae ai."

Heoi, i te rā whai muri ka whakahokia tēnei īmera ki a Sonny Tau me te kōrero ehara tēnā i te mahi a te minita, inā he kaupapa tēnei e tūwhera ana ki te katoa.

Kāti e ai ki a Winston Peters anō ko te kirimana rima rau mano tāra i waenga i Te Puni Kōkiri me te NHC tētahi atu tauira o te whakapakari i ngā tono komihana.

Heoi, e ai ki te Minita, ka whakauru tono komihana pea rātou.  E ai ki a Willie Jackson, heamana o MUMA, he whakatītaha tērā i te papa whakataetae.  Ko rātou tētahi kua tuku tono komihana, nāna hoki ngā whakamārama mō ngā whakapaunga pūtea i tono i raro i te ture i Te Puni Kōkiri.

Hei te Rāmere e tū mai nei kati ai te wāhanga ki ngā tono komihana.  Ā, mā te wā noa e whakatau i te ara whakamua.