Kua puta ngā whakaaro a ngā kaipōti o Tāmaki mo te tāke hinu o Reipa

  • Tāmaki Makaurau

Kāore ngā kaipōti o Tāmaki Makaurau e rata ana ki te pikinga o te utu hinu i te tekau hēneti, ēngari, kāore rātou i te noho whakaparahako noa i te kaupapa here hou a Reipa mō ngā rori o Tāmaki.

Ko te tāke hinu 10 hēneti kei ia rita te utu mō te whakatika Waka Whenua ki Tāmaki Makaurau i roto i te kaupapa here light rail a Reipa.

Ko tā te mema pāremata o Tāmaki Makaurau a Peeni Henare, "Ko te hiahia kia whakaiti hāere te kaute o ngā motokā ki runga i ngā huarahi o Tāmaki Makaurau kia wātea ai te tangata ki te hāere ki ngā wāhi e hiahia ana ki te hāere atu."

Ēngari, kāore ngā kaipōti o Tāmaki Makaurau i te whakaae.

Ko tā tētahi kaipōti, "He nui te hinu i tēnei wā, nō reira ko te kakenga 10 hēneti he āhua nui tērā."

Ko tā tētahi atu kaipōti, "Kaue e whakahiki i te utu hinu, kaua e tāpiri tāke anō hoki nā te mea he nui te utu hinu i tēnei wā."

Ko tā te mema pāremata o Tāmaki Makaurau a Peeni Henare, he māmā noa te whakautu. "Ki te amuamu koe mo te tāke ki runga i te penehēni tēnā pea kua tāe ki te wā me kake koe ki runga i te pahi, ki runga i te tereina kua whakaritea mai e mātou."

E tautoko ana te katoa o ngā tāngata i tūtakihia, me whakatika te kāwanatanga i ngā raru Waka Whenua o Tāmaki Makaurau.

Ko tā tētahi kaipōti, "He pōturi tonu ngā tereina, ā, kāore ngā pahi i tae i te wā tika."

Ko tā tētahi atu kaipōti, "Ka hokona atu tōku waka kia tāhuri atu ki ngā waka whenua mō te marea."

Ēngari, kei ngā kaupapa here o Nahinara o Reipa rānei ngā whakautu ki te opeti o ngā huarahi o Tāmaki?

E ai ki a Peeni Henare, "Ko tā rātou mahere ki roto i te rua tekau tau, ko tā mātou kia whakarāpopoto i ngā tau kua whakaritea e te kāwanatanga mō tēnei kaupapa."

E ai ki tētahi kaipōti, "Mōku ake, ka pōti ahau mō te rerekētanga. Ko te take ia ka utua e te katoa. Kāore e kino ake i te utu i tēnei wā."

E ai ki tētahi atu kaipōti, "He mea pai kia whiwhi waka whenua ki te taunga rererangi nā te mea he uaua ki te haere ki te taunga rererangi."

Ahakoa kei runga a light rail i te rārangi kaupapa o Nahinara, ko tā rātou aronga matua kei ngā hononga huarahi, kei te ara tereina hoki o Te Whanganui-ā-Tara.