Kua puāwai te moemoeā kia waihangahia tētahi terenga waka hōu ki Māngere

  • Tāmaki Makaurau

He terenga waka, he herenga waka hoki, kōia tenei ko "Ngā Hau Māngere" i whakatūwherahia i te pūaotanga o tēnei atatū, i raro i ngā karakia i takina e ngā kaumātua o Te Waiohua, o Tainui.

He moemoeā kua tutuki i te rā nei, mō te rohe o Te Piriti o Māngere, he wāhi e muia ana e ngā iwi katoa e aruaru ana i ngā tini a tangaroa, e te hunga hoe waka, e te hunga whakapakari tinana hoki.

He whakawātea i ngā huarahi mō te hunga ka whakamahi i tēnei wāhi hei whakatere waka, hei herenga waka, engari he whakamaumahara anō kia rātou kua aituahia i roto i ēnei wai o te Mānukanuka a Hoturoa.

Ko te whakamana anō i ngā ingoa tūturu o nehe, te take i tapaina ai tēnei terenga waka ko Ngā Hau Māngere.

Otirā, mō ngā iwi tautoko i tae ā tinana mai i tēnei ata, he moemoeā tēnei kua roa e wawatatia ana.