Ngā kaupapa: Education, Te Reo Māori

Kua puare Te Kōhao Hauora ki Kirikiriroa i te Puna Reo hōu

  • Waikato/Te Waiariki

Ko Te Kōhao Hauora, he ratonga nā NUMA - Te Mana Māori Noho Taone ā-Motu kua whakatuwhera i te Puna Reo tuatahi ki Kirikiriroa. He mea whakatuwhera, e Te Makau Ariki o Kīngi Tūheitia, e Atawhai Paki.

Ko Te Puna Reo o Kōhao te ingoa o te kura rūmaki reo Māori hōu mā ngā moroitiiti.

Hei tā tētahi Kaiwhakahaere o Te Kōhao Health a Tureiti Moxon, “Kei te whakareri mātou i a rātou mō te kura kaupapa. Ki te whakarongo ki ō rātou reo, ki ā rātou mātauranga, mātauranga i roto i te ngāhere, mātauranga i roto i ngā mea katoa.”

Otirā, nā Te Kōhao Hauora i hura ngā pou whakaairo hōu e rua, hei whakamānawa i ngā hapū o te rohe, o Ngāti Wairere, o Ngāti Hauā, o Ngāti Mahanga o Ngāti Korokī-Kahukura hoki anō hoki.

E ai ki te Mangai o Ngāti Korokī-Kahukura a Rahui Papa, “Ko ēnei poupou nei he oranga mō te wairua, he oranga mō te ngākau Māori, he oranga mō te tikanga Māori. Ko te Puna Reo ko te oranga o te reo, otirā, ko te oranga o ngā tātou pūkeikura mokopuna e noho mai ana ki roto o Kirikiriroa.”

Nō tērā tau a Moxon i tono ai ki te Tāhuhu Mātauranga mō te putea tautoko hei whakatū i te kura kotahi rau ōrau reo Māori, ki te taha o tōna Kōhungahunga reo rua mā ngā pēpi hōu ki te toru tau te pakeke. Kua utua e te Tāhūhū Mātauranga kia haurua o te nama, o te kotahi ira rua miriona tara.

Hei tā Moxon, “He tino maha o ā mātou tamariki kāore e mōhio ki te kōrero Māori. E tino maha  ō mātou mātua, kāore rātou e tino mōhio he aha ngā tikanga Māori mō tēnei mō tēnā.”

Ki te hoatu he whare, he wāhi mō te whānau ki te tupu ake i roto i te reo.

Ka tāea e ngā nohinohi e whā tekau te rahi te kuhu atu ki Te Puna Reo, e toru ki te whā tau te pakeke. Ko te manako tīmata ai tōna tekau ngā moroitiiti, hei te paunga o tēnei marama .