Kua pōtihia e Waikato-Tainui mo te Kāwanatanga o te Iwi

Te Kāea
  • Waikato/Te Waiariki

E rua ngā tauira Kāwanatanga kua horahia ki mua i te Iwi o Waikato-Tainui, hei pōti ko tēhea te kawenata e hiahia ana rātou hei mana whakahaere i ngā kaupapa a te iwi. 

No te rā nei tū ai ngā pōtitanga a ngā mema, a ko te tauira ā Marae te mea i aronuihia e te Iwi i runga ake i te tauira Status Quo.

Rua tekau mā toru rā i tukua ki ngā mema o Waikato-Tainui, kia pōti mo te whakarite kawenata hou hei whakahaere i ngā take o to ratou iwi.

Hei tā Rahui Papa, “Neke atu i te rima mano tangata o Waikato-Tainui i tuku pōti mai kia kīa mai e rātou he aha nei te āhua hanga o te waka hou hei kawe i a Waikato-Tainui ki tua o pae.”

He iti iti noa iho ngā rerekētanga ka āheitia e te Status Quo, ka orite ngā nama mo ngā mema o Te Kauhanganui, me Te Ara Taura. Ko te āwangawanga a Patara Berryman, kei ngaro ngā reo o āpopo.

E ai ki a Patara Berryman, “Mena ka whakakorengia tētahi o aua tūranga, ka pēwhea mātou te rangatahi? Ka pēwhea mātou e tāea ai te mōhio pai ki ngā āhuatanga e pā mai ana ki tō tātou iwi ina kore tātou e noho ana ki roto i te whare? Nā tēra e tino ngākau nui ana au ki te Status Quo plus.”

Hei tā Rangimaria Tahana, ka āwangawanga ia mo te mana o ngā Marae i roto i ngā kōrero me ngā whakaritenga, kāore i te mārama.

Hei tāna, “Mana o te marae te mea e ngaro ana ki te Status Quo o te ahuatanga whakahaere o te whare i ngā wā o mua. Kua waiho mā ngā māngai o ngā Marae e whakahoki atu I ngā take o o rātou Marae, kia whakatakotoria ki mua i Te Kauhanganui, a mā Te Kauhanga te mana e mana ait e kaupapa a te Marae.”

I raro i te tauira Marae, ka whakaitihia ngā mema o Te Kauhanganui mai te rua rau ma rima ki te tahi rau toru tekau ma whitu, me ngā mema o Te Ara Taura mai te tekau mā tahi ki te iwa, koia te take i pōti ai a Rangimaria mo te tauira Marae.

Hei tā Rangimaria Tahana,”Kia anga whakamua. Kia anga whakamua te iwi i raro i te whakaaro kotahi. Kua tae te wā.”

Kua tae ki te wā me whakarerekē engari ko tēhea te tauira i ngākaunuitia e te iwi.

E ai ki a Rahui Papa, “Ka mutu o roto o te rima mano kua tuku pōti mai, neke atu i te whitu tekau paeheneti o ngēra tangata kua tohua atu ko te Marae model hei whainga ma rātou. Kei Te Kauhanga nui te kōrero whakamutunga.”